Australiap danskit ikuallattumut ikiuunniarnerat qujaannarfigigaa
Danskit Australiami pinngortitami ikuallattoqarniarnerat ikiuunnissaa Australiali qujaannarallarpoq.
Danskit Upalungaarsimanermut aqutsisoqarfia nittartakkamini taama paasissutissiivoq.
Upalungaarsimanermut aqutsisoqarfiup inuit 50-it aallartissinnaallugit neqeroorutigaa.
Neqerooruteqarneq australiami oqartussanut anngunneqarpoq. Danskilli qatserisartut maannakkorpiaq aallassanngillat, australiamiummi tungaanniit piffissami matumani tamanna kissaatigineqanngilaq.
Illersornissamut ministerip, Trine Bramsenip (S) Danmarkip neqerooruteqarnera naak atorneqalinngikkaluartoq qujassutigineqartoq oqaatigaa.
AAMMA ATUARUK Uumasut milliardit Australiami orpippassuit ikuallanneranni toqusut
- Sumiiffimmi oqartussat pissutsinik pisariaqartitsinermillu piffissami matumani naliliilluarsinnaanerpaapput. Danmarkimit ikiuunnissatsinnik neqerooruteqarnerput nuannaarutigaara. Neqeroorullu taanna atuutiinnassaaq, Trine Bramsen oqartoq Upalungaarsimanermut aqutsisoqarfik allappoq.
Ministerip danskit ikiuunnissaat piffissami kingusinnerusukkut pisariaqalersinnaasoq erseqqissaatigaa, Australiamimi apriilip maajillu tungaanut nalinginnaasumik pinngortitami ikuallattoqartarmat.
Qatserisartunik 50-inik aallartitsinissamut piareersarneq maannakkut unitsikkallarneqarpoq, taakkuli 50-it pisariaqalissagaluarpat erngertumik aallartinneqaratarsinnaapput.
Australiap Danmarkimut aallartitaata Maryellen Millerip Danmarkip ikiuunniarnera qujassuteqarfigaa.
- Danskinik oqartussanillu soorlu Upalungaarsimanermut aqutsisoqarfimmik ingerlaavartumik oqaloqatigiissuteqarfigilluartakkatsinnut tapersiiniarnermut qujamasullutalu tuppallerpugut.
AAMMA ATUARUK Australiami qeqertami innuttaasut sakkutuunit qimagussorneqartut
- Pinngortitami ikuallannerit annertussusaat aliatsannarluinnartumillu kingunerisaat maannamut takuneqarsimanngillat, qujanartumilli Australia pisumut atortussaqarluarlunilu aaqqissuussilluarsimavoq, Upalungaarsimanermut aqutsisoqarfiup nalunaarutaani ilaatigut oqarpoq.
Danskit qassiiusut ikuallattoqarnerata akiornissaanut tapersiinissaq kissaatigisimavaat. Dansk Røde Korsilu Danmarkimi sapaatip akunnerani matumani katersuiniarnermik aallartitsivoq.
Australiap Danmarkimut aallartitaata aningaasatigut tapiissuteqarnerit nuannaarutigai, taassumalu upalungaarsimasunut imaluunniit qatserisartut Dansk Røde Korsianulluunniit toqqaananrtumik aningaasanik tunissuteqartoqarnissaa kaammattuutigaa.
/ritzau/
