Atuartut ’ulluinnarni ujarassiornerup sunniutaanik’ unammisut
Ujarassiorit nuna tamakkerlugu nuannariinnarlugu ujarassiortunut ujaqqanik nassaaminnik nassiusserusuttunut ukiut tamaasa unammisitsisarpoq.
Ukioq mannali kinguaariinni nukarliunerusut aamma ilaatinneqarmata nunatsinni atuartut tamarmik atuarfinni unammisitsinermut peqataasinnaapput.
Unammisitsinermi “Ulluinnarni ujarassiornerup sunniutai” qulequtarineqarpoq. Qulequttallu atuartut ujarassiornermi tunisassiat tamani nassaassaasut ulluinnarnilu pinngitsoorsinnaanngisagut pillugit eqqaasissavai
Maannalu ajugaasoqarpoq.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik tusagassiuutinut nalunaarummi allappoq.
Atuartut ulluinnarni atortorissaarummik nammineq toqqaallutik misissuisinnaatinneqarput.
Naatsorsueqqissaarneq, plakatit videolu
Nuummi Atuarfik Hans Lyngemi 2.A-t unammisitsinermi ajugaapput.
Atuaqatigiit smartphonesit sammisimavai, taakkulu plakatinik sisamanik aatsitassat sorliit smartphoneliornermut pisariaqarneranik nassuiaasumik nassiussisimapput.
Tamatuma saniatigut klassini allani smartphonenit qassiunerannik naatsorsueqqissaarsimapput sissamullu katersiartornerminni videoliorlutillu ujaqqanik immikkoortitereqqissaarsimapput.
Unammisitsinermi naliliisut klassip sammisamut tunniusimalluarsimanera siammasissumillu misissuisimanerat qanorlu ilusiliisimanerat pingaartuutippaat. Atuaqatigiit 5.000 koruuninik akissarsitinneqarput.
Smartphonenut tunngasut allat
Nuummi Nuussuup Atuarfiani 6.A-t aappaattut ajugaasuupput, taakku 3.000 koruuninnapput.
Taakku smartphonet aamma sammivaat – aatsitassallu qanoq atorneqarnerannik nassuiaallutik slidesiliorsimapput.
Ajugaasut pingajui Nuummi Nuussuup Atuarfiani 5.B-mi atuartuupput, taakku smartphonenik aamma misissuisimapput. Taakku slidesit plakatillu atorlugit smartphonenit sananeqarnerat saqqummiuppaat.
Aatsitassaqarnermut naalakkersuisoqarfiup klassit peqataanerat qujassutigaa.
- Unammisitsinermut tulliuttumut suli peqataasoqarnerunissaa qilanaarutigaarput, naalakkersuisoqarfik tusagassiuutinut nalunaarummi allappoq.
