Atuarfinni aaqqiissutissani angajoqqaat unamminarnerpaassapput
Atuarfitsialaap nalilersornerata saqqummiunneqarnerata kingorna Nivi Olsenip pilersaarutigisani suliassat tallimaasut saqqummiummagit tamanna erserpoq.
Suliassaani siulleq tassaavoq atuarfinni aqutsisut marlunngortinnissaat, allaffissornikkut ilisimasalimmik perorsaasumillu ilinniarnikumik atorfinititsinissaq.
Aappaattut, atuartitsinerup pitsaassusianik nalilersuisitsinissaq ingerlanneqassaaq. Taannalu ukiumut minnerpaamik ataasiarlugu naalakkersuisoqarfimmut nassiunneqartassaaq, ilinniartitaanermullu naalakkersuisoq taamaaliorusuppoq atuarfeqarfiit killiffigisaat malinnaaviginiarlugu.
Aamma atuaruk Nivi: Pisuutitseqattaarunnaarta
Suliassaani pingajuuvoq, iliuusissanik pilersaarutit, atuarfinni tamani meeqqanullu tamanut atuutsinnissaa siunertaalluni.
- Pingajuattut elevmappimik taallugu, iliusuusissanik pilersaarutit, atuartut mappii, taakku pingaartorujummik piumasaqaatigissuagut sakkortuumik atuarfinni meeqqanilu tamani naammassineqarnissaat, Ilinniartitaanermut Naalakkersuisoq, Nivi Olsen, Demokraatineersoq oqarpoq.
Suliassani oqimaannerpaasussaq
Sisamaattut, atuarfiup angerlarsimaffiup suleqatigiinneri nukittorsarneqarnissaat anguniarlugu angajoqqaat peqatigiiffianik pilersitsisoqarnissaa suliassaminut ilannguppaa, taassumallu allaffissornertaa aningaasaliiffiginissaanut pilersaaruteqarpoq.
-Ikiorserniarlugit nukittoorujummik kattuffilerlugu, nipi ersarissoq inuiaqatigiinnut annissinnaaniassammassuk. Taava pisussaaffiliigami taanna angajoqqaaninngaanniik nakkutilliisooqqatullu inississagamik, Nivi Olsen taama oqarpoq.
Taannalu suliassaq oqimaannerpaajussasoq Ilinniartitaanermut naalakkersuisup naqissuserpaa.
Tallimaattut, meeqqat atuarfiini allamiut oqaasiinik ilikkarniarneq ajornartorsiutaaqisoq qaangerniarlugu, allamiut oqaasiinik ilisimasalinnik pilersitsinissani siunniuppaa, taakkuali aaqqiissutissanik nukittorsaanissamullu aqqutissiuissasut siunertaavoq.
Iliuusissatut pilersaarutit tallimat saniatigut, Inerisaavik Naalakkersuisoqarfiup ataanut inissinneqartoq Ilinniartitaanermut Naalakkersuisup, Nivi Olsenip oqaatigaa.