Qulaarpaa Nivi: Pisuutitseqattaarunnaarta
Ajornartorsiutaasut amerlapput taamaammat, Nivi Olsen isumaqarpoq akisussaaffik qimarratigineqarunnaassasoq aammalu nalilersuineq imaqarluartoq atorfissaqartitaminnik.
- Uanga isumaqarpunga taama ajornartorsiut angitigitillugu pikkoriffiginerusariaqaripput qanoq aaqqiinissaq eqqarsaatigissallugu, Ilinniartitaanermut Naalakkersuisoq Nivi Olsen oqarpoq.
Kaammattuivoq
Kaammattuillunilu kikkut tamarmik allanik pisuutitseqattaarunnaarlutik, nalunaarusiami allassimasutut susassaqartut tamarmik iluatsinngisaqarnerat nassuerutigineqassasoq.
Erseqqissarpaalu ajornartorsiutit qimarratigiinnaraluaraanni iluaqutaanngitsoq. Aammalu oqaatigaa isit matugaluaraanni iluaqutaanngitsoq. Naliliineq Meeqqat Atuarfiata pitsanngorsarnerani iluaqutissaasutut isigaa.
- Rapportip uuma takutippaa ajornartorsiutit ilumut takorluungaannaanngitsut immaqaluunniit eqqoriaannaanerunngitsut. Taammaattumik atorluarsinnaavarput oqarluta ilumoortumik paasissutissanik tunivaatigut taava tassanngaanniit eqqoriaanerunngitsumik aaqqiissutissanik pilersitsitsisinnaalissuugut.
Iliuusissat assigiinngitsut
Aaqqitassat amerlammata Nivi Olsen-ip erseqqissaassutigaa ataatsikkut aaqqinneqarsinnaanngitsut.
Taamaammat eqqarsarluarlutik iliuusissatik assigiinngitsut immikkoortiteqqaarniarpaat:
- Piffinni iliuuseqarfigisassatsinnut agguarnikuuagut, ataasiakkaarlugit sammissuagut ataatsikkorsuaq aaqqiissutissanik peqanngilagut.
Taakkulu aaqqiissutissat sisamanngorpat Qulaarpaa-mi pulaartuuleruni itisilerniarlugit oqaatigaa.
Maligassaqartut
Nivi Olsen nalilersuinermi pitsaasunik aammalu pitsaavallaanngitsunik maluginiagaqarsimavoq.
Eqqaavaa aamma ilinniartitsisoqartoq ilinniartitsillaqqissunik aammalu aqutsillaqqissunik aqutsisoqartoq. Taamaattumillu eqqaavaa suna tamarmi ajortuinnaanngitsoq pitsaasumillu takutitsisut tassaasut maligassagut aammalu qanoq ilillutik iluatsitsisarnersut paasianigassagut.
