Atuarfik Inussuk ammarneqarnissamut suli piariinngitsoq
Atuartut ukiaanerani atuanngiffeqareerlutik ataasinngorpat atuaqqilissapput.
Nuulli qiterpasissuani atuarfik nutaaq Atuarfik Inussuk suli atorneqarsinnaalernavianngilaq.
Suliarujussuarmi 600 millionit koruuningajannik nalilik atorneqalernissamut suli piareersimanngilaq. Sanasut suli sulipput.
Kommuneqarfik Sermersuumi borgmesterip Avaaraq Olsenip tamanna ajuusaarutigaa. Tusagassiorfinnut nalunaarummi taama allappoq:
- Kinguaattoornerup malitsigisaanik ajornartorsiutaasinnaasut ajuusaarutigivavut. Tamanna atuartunut, angajoqqaanut atuarfimmilu sulisussanut aammali peqatigiiffinnut eqaarsaartarfinnik allanillu atuisussanut sunnerneqartunut uggornarpoq, Avaaraq Olsen oqarpoq.
Aallartinissarneq nalorninartoq
Atuartullu ukiaanerani atuanngiffeqareerlutik Atuarfik Inussummut isertersinnaanissaat kommunip aamma neriuutigisimagaluarpaa.
Kommuneqarfik Sermersuumi kommunaldirektøri Ole Jakobsen tusagassiorfinnut nalunaarummi aamma issuarneqarpoq:
- Atuartut ukiaanerani atuanngiffeqarneranni atuarfiup ammarneqarnissaa neriuutigigaluaqaarput ajoraluartumilli taamaattoqanngilaq. Atuarfiup inaarutaasumik akuersissutigineqannginnerani pissutsit assigiinngitsut inissinneqaqqaartariaqarput. Suliaq taanna tuaviuussinnaanngilluinnarparput, taanna oqarpoq.
Nuullu qeqqani atuarfik qaammatit marluk matuma siornatigut tassa atorneqalertussaagaluarpoq.
Aallartinissarneq taamanikkut nalorninartortaqarpoq. Atuartut atuarfimmi tassani atualersinnaanissaannut ulluliinerit allanngortinneqaqattaarput, atuartummi atuarfimmi nutaami atualersinnaanersut allamiluunniit atuarallassanersut pillugu paasissutissat nalorninartortaqarput.
Angajoqqaallu meeqqamik Atuarfik Inussummi qaqugu atualertussaalernerannut nalornisunut tamanna soorunami pakatsissutigineqarpoq.
Atuarfiup pisortaata Uffe Lilholmip tamanna ajuusaarutigalugu KNR-imut taamani oqaatigaa:
- Atualeqqaartoortussanut peqataajartorlutik nunatsinnit tamarmit timmisartukkut angalanissaminnut billetsisimasunut tamanna pingaartumik uggornarpoq. Atuarfittulli tamanna iliuuseqarfigisinnaavallaanngilarput, taamaallaat ilaqutariinnut tamatuma ajoqutaasimanissaa ajuusaarutigisinnaallugu, atualeqqaarfissamillu pitsaanerpaatitsiniarsaraluta, Uffe Lilholm taamani oqarpoq.
Suliaq pakatsinartoq
Atuarfiullu Kalaallit Nunaanni nutaajunerpaap, siunissamullu piareeersimanerpaap naammassineqarnissaanut tassa ulapputtoqarpoq.
Borgmesterip Avaaraq Olsenip suliaq qanimut malinnaavigaa. Taassumami atuarfimmik nutaamik sanaartorneq allaffimminit isikkivigaa. Atuartut atuarfimmut nutaamut suli atuariartortannginnerat ullut tamaasa takusinnnaavaa.
Atuartut illoqarfimmi atuarfinni allani atugarisaasa sapinngisamik pitsaasuunissaat kommunip sulissutigigaa borgmesterip Avaaraq Olsenip oqaatigaa.
- Atuarfiup atulersinneqarnissaata utaqqinerani Atuarfik Ukaliusaq aamma Atuarfik Samuel Kleinschmidt utaqqiisaasumik atorneqarput taakkunanilu atugassaritinneqarallartut pitsanngorsaavigineqarnissaat pingaartipparput, taanna oqarpoq.
