Nuummi atuarfissaq kinguaattoorneroqqittoq
Nuummi Atuarfik Inussummi ukioq atuarfiusoq nutaaq sapaatip akunnera ataaseq qaangiuppat aallartittussaagaluarpoq. Aallartissanngilarli, atualernissarlu aallaqqaammut aggustip 29-anut kinguartinneqarpoq.
Ullorli taanna aamma piareereersinnaanngitsoq, Kommuneqarfik Sermersooq nittartakkamini tallimanngornermi ualikkut allappoq.
Atuarfiup ikuallattoqarnissaanut kalerrisaarinermut atortuisa ajornakusoortut taakku akuersissutaat suli inissinneqarsimannginnerat pissutaasoq, tusagassiuutinut nalunaarummi allassimavoq.
- Ajoraluartumik atuarfimmi ulluinnarsiuteqalertussanut tamanut qilanaartunut akornutaasinnaanera eqqumaffigeqqissaarparput. Ikuallattoornermi isumannaallisaanerup qulakkeeqqaartinnagu ammannginnissarput uatsinnut pingaaruteqarluinnarpoq, Kommuneqarfik Sermersuumi kommunaldirektøri Ole Jakobsen oqarpoq.
Atuarfitoqqani atualeqqaassasut
Tamanna pissutiglaugu atuarfimmi nutaami atualertussat Atuarfik Samuel Kleinschmidtimi imaluunniit Atuarfik Ukaliusami atuarnertik aallarteqqaassavaat, atuartulli sorliit sorlermi atualissanersut suli aalajangerneqanngilaq. Taamaakkaluartorli ukioq atuarfiusoq aggustip ulluisa 15-ianni aallartissasoq, kommune allappoq.
Atuartut ilinniartitsisullu atuarfimmut nutaarluinnarmut Atuarfik Inussummut qaqugu nuussinnaassanersoq suli ilisimaneqanngilaq.
KNR-ip islandimiut sanaartornermik suliassinneqartartui Istak sanaarnermi suliaqartuusoq sapaatip akunnera ataaseq sinnerlugu oqaaseqartinniarsaraa, tamannali iluatsinngilaq. Atuarfiup pisortaa itisiliitinniarsarigaluarparput, taassumali kommunimit tusagassiuutinut nalunaarut innersuussutigaa.
