Atuarfitoqqat atualeqqaarnissap paatsuungassutigineqarnerata kingorna puiaaqqittut

Atuartitsivitoqqani ilisimasat nutaat. Atuartut Nuummi atuarfimmi nutaami aqagu aallartittussaagaluartut atuartitsivitoqqani ASK-imi USK-imilu atualeqqaarneranni tamanna qulequtaassaaq.

Allattoq Nicole Sander Bertelsen

aggustip 14-at 2024 16:47

Naqinnerit, klassimi malittarisassat, tuluttut oqaatsit kisitsisillu 1-imiit 100-mut iikkami nivingapput.

Atuarnerup aallartinnissaanut aqaguinnanngortoq init tamarmik atuartitsivittut nalinginnaasutut isikkoqarput. Atuartitsinerilli ulluinut siullermut piareersarneq Nuummi meeqqat atuarfiini Atuarfik Samuel Kleinschmidtimi ASK-imi aamma Atuarfik Ukaliusami USK-imi ilinniartitsisunut nalinginnaanngilaq.

Nerriviimmi akunnerni aqqanilinni nuussorneqarput, nutsernermilu karsit torsuusani qaleriissaarsimapput, taakkulu atuartitsinernut klassinullu assigiinngitsunut nalunaarsorsimapput.

Aamma atuarukNuummi atuarfissaq kinguaattoorneroqqittoq

Nerriviit, karsit, nipititerutillu akornanni ilinniartitsisut atualeqqaartoqarnissaanut inissiiniarlutik tuaviorput.

- Atuartitsivissara suleqatimma atuartitsivissaanut sanilliullugu imaqanngilaq, kisianni atuarneq aallartissinnaavarput, inimi pinnersaatit sapaatini akunnerni tulliuttuni ikkussorumaarpagut, Nuka Thomassen USK-imi 3.b-nik atuartitsilertussaq oqarpoq.

Nutaaqanngilaq, kisianni suna tamarmi nutaajusoq

Nuka Thomassenimut taassumalu atuartitaanut allanngortoqanngilaq. Taakku aasaanerani atuanngiffeqalinnginnermi atuarfimmut nutaamut Atuarfik Inussummut nuuttussaaneq pissutigalugu poortorsimasartik aallartiffigeqqissavaat.

USK-imi suut tamarmik qangatut ittut ASK-imi 4. klassimit 9. klassimut atuartut aallartiffigisassaanni suut tamarmik ulapputigineqarput.

- Ulapissuarsuaarpugut piareersaalluta suna tamaaviat tamaat imaarnikuugaluaratsigu, Salomine Tobiassen ukiup sisamassaanik atuartunut ilinniartitsisoq oqarpoq.

Atuarfilli puiarneqaannartussaanngilaq, atuarfimmi nutaaq piareerneqanngimmat 4. klassimit 9. klassimut atuartut nutaamik katiterneqarput, taamaammat atuartut tamarmik nutaanik atuaqatertaartussaallutik, atuarfiup pisortaa, Uffe Linholm oqarpoq.

- Taamaammat sinaakkutissat inissilluarnissaannut ilungersorpugut, taamaaliornikkummi atuartut atuaqatissaminnik nutaanik ilinniarnerannut taakku ajoqutaassanngillat, taanna oqarpoq.

ATUARFIK INUSSUMMI ATUARTUT ATUALEQQAARNISSAATA INGERLARNGA

Aasaanerani atuanngiffeqarneq aallartimmat ukioq atuarfiusoq nutaaq aggustip 15-ianni aallartittussatut pilersaarutigineqarpoq.

Atuartulli Atuarfik Inussummi atualeqqaarnissaat ullunik 14-inik kinguartinneqartoq Kommuneqarfik Sermersuup juulip 25-anni nalunaarutigaa, taamaalilluni ulloq atualeqqaarfissaq aggustip 29-annut kingunartinneqarluni.

Aallaqqaammulli pilersaarutaasoq aggustip 15-ianni atualertoqarnissaa atuinnassasoq kommunip aggustip qulingiluaani nalunaarutigaa, taamaammat atuartut aggustip 15-iani atualissapput.

Nuummi atuarfiup nutaap atualertoqarnissaanut suli naammassinnginnera pissutaavoq, qaqugulu naammassissanersoq suli ilisimaneqarani.

Taamaammat atuarfitoqqat ASK aamma USK Atuarfik Inussummi atuartitsiviit nutaat atulersinnaanissaata tungaanut atulerneqaqqipput.

Piffissamulli piareerniarneq piffissami pingaarnersiuiniarfiungaatsiartoq, atuarfiup pisortaata oqaatigaa. Atuartitsivissat, torsuusut, atuartitsiviillu soorlu fysikkertarfiit salliutinneqarsimasut, Uffe Lilholmip oqaatigaa.

- Allaanngilaq nutaamut suliartorluni, puuiaaqqilluni allaavoq, Hansine Eugenius 7. Klassinik ataatsimoortinneqarsimasunik nutaanik aqagumit atuartitsilertussaq oqarpoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.