Ruslandimi nunap ilaani killeqarfimmi inatsisitigut upalungaarsimaneq atuutsinneqalertoq

Ruslandimi nunap ilaani Belgorodimi Ukrainep killeqarfianiittumi inatsisitigut upalungaarsimaneq atuutsinneqalerpoq.

Nunap ilaani guvernøri Vjatsjeslav Gladkov attaveqaqatigiinnikkut sullissivikkut Telegramikkut videokkut ilisimatitsisoq Reuters allappoq.

Inatsisitigut upalungaarsimanermik atuutsitsilerneq nunap ilaani tamarmi atuuttunngortinneqarpoq guvernørillu ilisimatitsissutigaa ukrainemiut saassussinerannik patsiseqartoq.

- Belgorodimi atugarisaasut artornaqaat, taanna oqarpoq.

Oqarportaaq Ukrainep sakkutuuisa saassussineranni illut aserortersimasut sakkutuujunngitsullu toqutaasimasut ikiliigaasimasullu.

- Taamaattumik ullumimiit atuutilersumik nunap ilaanut atuuttussamik inatsisitigut upalungaarsimanermik atuutsitsilerpugut Ruslandimilu tamarmi atuuttussamik inatsisitigut upalungaarsimanissamik atuutsitsilernissamik suaarutiginnittoqarnissaanik naalakkersuisut kaammattorlugit, Gladkov videomi oqarpoq.

Inatsisitigut upalungaarsimanerup kingunerisai sorpiaanersut suli erseqqissarneqanngilaq.

Russit oqartussaasuisa Belgorodip ilaani najugaqartut ataasinngormat qimarnguppaat, tamannalu aamma patsiseqarpoq ukrainemiut sakkutuuisa sumiiffimmiinnerat.

Belgorod Kurskip kujataaniippoq, tassanilu aamma sumiiffinni arlalinni qimarngussisoqarpoq.

Inuit 121.000-t missaat Kursk ataasinngormat qimappaat.

Killeqarfiup eqqaani Ruslandimi sumiiffiit ilaat Ukrainep aggustip arferngani saassuppai.