Ruslandip Ukraine sumiiffinnit assigiinngitsunit saassuppaa

Ruslandip Ukraine unnuaq saassuppaa.

Ukrainep kangisissuani immikkoortumi Donbassimi "immikkut ittumik saassussisoqartoq" Ruslandip præsidentiata Vladimir Putinip oqalugiarnermini oqaatigaa.

Ruslandimi TV-kkut unnuaq oqalugiarnermini taama nalunaaruteqarpoq.

Ukrainemi sumiiffinni arlalinni sakkuaattoqarneranik kingorna taava nalunaaruteqartoqartalerpoq.

Illoqarfinni assigiinngitsuni eqqartoqarpalullunilu qaartoqarpallattarnera nalunaarutigineqarpoq. Kijevimi, Kharkivimi, Odessami, Berdyanskimi, Mariupolimi, Ruslandillu immikkoortuani Belgorodimi, Ukrainemut qanittumiittumi, sakkuaattoqarpoq.

Ukrainep kippasissortaani illoqarfik Lviv qamutilittarneqarlunilu raketinik saassunneqartoq Ukrainemi upalungaarsimasuutitat aamma nalunaarutigaat. Illoqarfik Lviv Ukrainep Polenimut killeqarfiata eqqaaniippoq.

Attaveqaatitigut atortulersuutit killeqarfimillu nakkutilliiviit saassunneqartut

Vladimir Putinip oqalugiarnera naammasseqqammersorlu saassussisoqarneranik nalunaarutit siulliit takkupput.

Russit timmisartui tallimat qulimiguulillu ataaseq Ukrainep kangisissortaani, nunaminertami pikitsitsisunit tigummineqartup eqqaani nakkartissimallugit Ukrainemi illersornissaqarfiup sisamanngornermi ullaakkut nalunaarutigaa.

Russilli tamanna Ruslandimi tusagassiorfik Ria aqqutigalugu ilumuunnginnerarpaat.

Ukrainep silaannarmit saassunneqarnermi illersuutai timmisartoqarfiilu atorneqarsinnaajunnaarsinneqarsimasut, Ruslandip illersornissamut ministereqarfiata sisamnngornermi ullaakkut nalunaaqutaq arfineq-marlunut nalunaarutigaa. Russit nutaarsiassaqartitsiviat Tass taama allappoq.

Ukrainep illersornissaqarfiata attaveqaatitigut atortulersuutai assigisaallu, killeqarfimmillu nakkutilliisoqarfii Ruslandimit saassunneqartut, Ukrainep præsidentiata Volodymyr Zelenskij-p sisamannngornermi ullaakkut oqaatigaa.

Russit sakkutuui sumiiffinnit assigiinngitsunit Ukrainemut isaasut

Ruslandip sakkutuui sumiiffinnit assigiinngitsunit Ukrainemut isaasut tusagassiorfiit assigiinngitsut nalunaarutigaat.

Ukrainemiut killeqarfimmik nakkutilliisuisa oqaatigaat Hvideruslandimut Ruslandimullu killeqarfiup nalaani saassussisoqartoq.