Polenimiu ministeriunermut saassussisimanini pissutigalugu Danmarkimiit anisitaasoq

Statsministeri assamminik eqissimasumik tillussimallugu Polenimiutut innuttaassusilik Danmarkiminngaanniit anisitaavoq. Qaammatini sisamani parnaarussaasussatut aamma eqqartuunneqarpoq.

Pingasunngormat Københavnimi illoqarfiup eqqartuussiviani eqqartuussut nalunaarutigineqarpoq. 39-inik ukiulik Københavnimi Kultorvemi Mette Frederiksen assamminik eqissimasaminik 7. juni tillussimallugu atorfilimmut nakuusersimasutut eqqartuunneqarpoq.

Statsministeri saassunneqarpoq polenimiu aalakoortoq nalaatsornikkut naapikkamiuk, kamattumik paasissaanngitsumillu oqalussimasoq uppernarsaasut oqarput.

Ikinngumminik kaffisoqateqarniarluni Mette Frederiksen marlunnik paarsisoqarluni saassunneqarpoq.

- Saassunneqarpoq statsministeriunini pissutigalugu, immikkut unnerluussisoq Anders Larson naggasiinermini oqarpoq.

Eqqartuussivimmi aamma oqaatigaa, Mette Frederiksenip tamanut oqaaseqaateqartarnera pissutigalugu saassussineq pisoq, taamaattumillu pisumut sukannernerulersitsisoq.

Eqqartuussiviulli - inatsisilerituutut ilinniarsimasup eqqartuussisup aamma inuinnaat eqqartuussisut marluk - tamanna tunngavissaqarsorinngilaat.

Tamassuma saniatigut kinguaassiuutitigut kannguttaatsuliornernut sisamaasunut eqqartuunneqarpoq.

Nørreport Stationimi arnaq 22-nik ukiulik attuaasimavaa, pisuni pingasuni pingasoriarluni arnanut niviarsiaqqanullu inuusuttunut usuni takutittarsimallugu.

Eqqartuussinerup kingorna illersuisup oqaatigaa eqqartuussissut akuerineqartoq.