Mette Frederiksenimut nakuuserniarnermik suliaq ullumi eqqartuussivilersuunneqartoq
Angut ministeriunermut Mette Frederiksenimut Københavnimi pisuinnaat aqqutaanni 2024-mi juunip arfineq-aappaani nakuuserniarsimasutut unnerluutigineqartoq pillugu suliaq Danmarkimi ullaaq manna aallartittumik eqqartuussivilersuunneqarpoq.
DR taama allappoq.
Angut 39-nik ukiulik polenimiusut innuttaassusiliusoq Mette Frederiksenip ikinngumminik pisuinnaat aqqutaatigoorluni naapigiaaleruttornerani tuiatigut sakatsisimasutut unnerluutigineqarpoq.
Angut taanna atorfilimmut nakuuserniarsimasutut unnerluutigineqarpoq, taamatullu unnerluutigineqarneq suliani immikkut ittuni ukiuni arfineq-pingasuni parnaarussassanngortitaanermik kinguneqarsinnaasarpoq.
Angulli taanna paragraffi alla sakkukitsumik nakuuserniarsimanermut tunngasoq malillugu sukannerpallaanngitsumik eqqartuunneqassasoq, illersuisuata ministeriunerup atuuffimminut attuumassuteqanngitsumukaruttornerani taamaa pineqarnera tunngavilersuutigalugu piumasaraa. Taamaaliornini politikkimik tunngaveqanngitsoq, angutip unnerluutigineqartup siusinnerusukkut aamma ilisimatitsissutigaa.
Sakkukitsumik nakuuserniarsimasutut eqqartuussanut pillaatissaatitaasussatut killigeqqusat sukannerpallaarneq ajorput.
Ministeriunerilli suliuaannartuummata unnerluutigineqartoq atorfilimmut nakuuserniarsimasutut eqqartuunneqartariaqartoq, Mette Frederiksenip illersuisua isumaqarpoq.
Angut taanna 39-nik ukiuliusoq polenimiusullu innuttaassusiliusoq tamatuma saniatigut puiaasanik 110 koruunit nalinginut utertitassanik tillissimasutut kannguttaalliorsimasutullu suliani sisamani aamma unnerluutigineqarpoq.
Mette Frederiksenimut nakuuserniarnermik suliaq ullumi marlunngornermi aqagulu pingasunngornermi eqqartuussivilersuunneqassaaq.
