Nuummi atuarfik nutaaq kingusinnerusukkut ammassasoq
Nuummi atuarfik nutaaq, Atuarfik Inussuk, aggustip 15-ni atulertussaagaluarpoq.
Sanaartornerli suli naammassinngimmat sanaartugassanillu suliassinneqartartut kinguaattoormata pilersaarutit kinguartinneqarput.
Kommuneqarfik Sermersooq nittartakkamini taama paasissutissiivoq.
Taamaattumik atuartut atualernissaat ullunik 14-inik kinguartinneqarmat aggustip 29-ni aatsaat atualertoqassaaq.
Sunngiffimmi ornittakkat AKO’llu USK-imut ASK-imullu attuumassuteqartut aasaanerani atuanngiffeqarnermi atuartunut ammaannassapput, atuartullu tamarmik aasaanerani atuanngiffiusumi sivitsorneqartumi paarineqarnissaat periarfissaassaaq.
Atuarfik Inussummi kingusinaarluni atualernissaq pissutigalugu aappaagu aasaanerani atuanngiffeqarnissaq juunip 24-ni aatsaat aallartissaaq, Nuummili atuarfinni allani atuartut ullunik sisamanik siusinnerusumik aasaanerani atuanngiffeqalissapput.
Atuartulli atuartutulli allatut ukiumut ullut 200-t atuarfigisassat allanngussanngitsoq kommunip ilisimatitsivoq.