Nalunaarusiaq: Atortorissaarutit nutaaliat tamat oqartussaaqataanerannut akornutaasinnaapput
Facebook, Twitter, Instagram, TikTok allarpassuillu.
Attaveqaqatigiittarfiit nunarsuami inuit imminnut attaveqatigiinnissaannut periarfissiipput.
Taakkulu aamma amerlasuunit paasissutissarsiorfittut pingaartinneqarlutik nuannarineqartarput.
Nittartakkakkulli attaveqaqatigiittarfiit iluaqutitaqaraluarlutik tamat oqartussaaqataanerannut tamanillu peqataaffigineqartumik oqallinnernut akornuterujussuanngorsinnaapput.
Nunani avannarlerni teknologi aamma tamat oqartussaaqataanerat pillugu misissuisut, Den Nordiske Tænketank for Tech og Demokratimi ilaasortat nalunaarusiaanni tamanna naqissuserneqarpoq.
Nunani avannarlerni teknologimillu tunngasunut suliffissuaqarfiusuni tamat oqartussaaqataanerata qanoq nukittorsaanissanut nalunaarusiaq siunnersuutinik imaqarpoq.
- Tamanna pingaaruteqaleraluttuinnarpoq, tassami teknologii aamma atortorissaarutit nutaaliat ima ineriartupiloortigipput allaat paasissutissat ilumoornersut ilumuunnginnersulluunniit immiikkortikkuminaallissalluni, misissuinermi nunarput sinnerlugu ilaasortaq, Ilisimatusarfimmi adjunki ph.d-tut allaatigisaqartoq, tusagassiuutilerinermi aamma nittartakkakkut attaveqaqatigiittarfiit pillugit ilisimatusartoq Signe Ravn-Højgaard oqarpoq.
Nunatsinni aamma takussaalissaaq
Ilisimatusartup oqarnera naapertorlugu nunarsuarmi nutaarsiassanik ilumuunngitsunik siammarterineq assersuutissartaqalereerpoq.
Ukrainemimi sorsunnermut tunngasunik arlalinnik assersuutissaqarpoq.
Nittartakkatigut sianiinaariniarneq sorsunnermi tassani qitiuvoq, illuatungeriit eqqunngitsunik nutaarsiassiiniarsaripput imminnullu uukapaatinniarsaralutik.
Tamannali nunatsinni suli takussaanngitsoq malunnanngitsorlu, piffissarli apeqqutaaginnartoq Signe Ravn-Højgaard oqarpoq.
- Kalaallit Nunaanni suli malugivallaanngilarput, sumiiffiilli ilaanni sukkasoorujussuarmik pisoqarpoq. Nittartakkani takusassat assigiinngitsut qarasaasiakkut nammineq pilersinneqartut takkussuutilissapput, kalaallisut aamma, Signe Ravn-Højgaard oqarpoq nangillunilu.
- Tassa imaappoq nunarsuami pisut suut ilumoornersut ilumuunnginnersulluunniit immikkoortikkuminaassinnaavoq. Tamat oqartussaaqataanerannullu akornutaasinnaasoq isumaqarpunga.
Innuttaasunut ataasiakkaanut takujuminaatsoq
Teknologiimik suliallit suliffeqarfissuit tamat oqartussaaqataanerannut ajornartorsiutit pilersitaat annerit qanoq aaqqinnissaannut tunngatillugu misissuisut siunnersuutinik aqqanilinnik suliaqarput.
Nalunaarusiami assersuutigalugu siunnersuutigineqarpoq nunani avannarlerni naalakkersuisut nunani avannarlerni ilisimatusarfimmik teknologiimik sulialinnut suliffeqarfissuarnut inatsisiliornissamut aamma innuttaasut digitalimut tunngasunik atuinerminni najoqqutarisinnaasaanik suliaqarfiusussamik pilersitsissasut.
Tassami digitalimut tunngasunik atuineq innuttaasunut ataasiakkaanut ajornakusoorsinnaasoq ilisimatusartoq naqissusiivoq.
- Innuttaasutut soorunami sissuernerusariaqarpugut. Inuit ataasiakkaat atuisut pillugit paasissutissat assigiinngitsut allanngortiterneqarsinnaasarput. Nittartakkatigulli peqquserluttuliorfigineqarnissamut periarfissarpassuaqalersinnaasarpoq, taamaattumillu innuttaasunut ataasiakkaanut imminut qanoq illersornissaq nalunarsinnaalluni, Signe Ravn-Højgaard oqarpoq.
Misissuisuttaaq siunnersuutigaat nunani avannarlerni meeqqat inuusuttullu atugaat illersorneqassasut, ukiunik uppernarsaanissamik piumasaqaateqarnermi nittartakkamik isumannaatsumik atuinissaq, angajoqqaat killilersuisinnaanissamut immikkut periarfissaat aamma innuttaasut ataatsimut isigalugu nakkutiginninnerulernissaannik kajumissaaralutik siunnersuuteqarput.
