Misissueqqissaarneq: Atlantiku qulaallugu timmisartunut mittarfeqarnera Kujataanut iluaqutaanerpaassaaq
Nuummi Ilulissanilu atlantiku qulaallugu timmisartunut mittarfissat 2023-mi atuutilissapput, timmisartullu Narsarsuarmut angallannerinut taarsiullugu Qaqortumi nunap immikkoortuani mittarfiliortoqarnissaa pilersaarutigineqarpoq.
Inuiaqatigiinnulli akilersinnaassusianik misissueqqissaarneq Kommune Kujalliup suliakkiutigisimasaa naapertorlugu, - nunap immikkoortuani mittarfiup takeqqatigisaanik - Atlantikup avannaaliartaatinut Qaqortumi 1.500 meterinik takissusilimmik mittarfiliorneq Kujataanut aningaasarsiornikkut iluanaaruteqarfiunerpaassaaq.
AAMMA ATUARUK Naalakkersuisooqatigiilersut Demokraatillu mittarfiit pillugit atsioqatigiissuteqartut
- Qaqortumi Atlantikup avannaaliartaatinut mittarfiliorneq nunap immikkoortuinnaanut mittarfiliornermit naleqarneruvoq, misissueqqissaarnermi KPMG Advisory Islandip suliarisimasaani paasisat pingaarnersaraattut oqaatigineqarpoq.
Taamatulli iliortoqassappat Narsarsuarmi mittarfik qulimiguulinnuinnaq mittarfinngortinneqartariaqassaaq.
Qaqortumi Mittarfik
Qaqortumi nunap immikkoortuani mittarfiliortoqarnissaa Narsarsuarmilu Mittarfiup qulimiguulinnuinnaq mittarfinngortinneqarnissaa Naalakkersuisut Demokraatillu siunnersuutigaat.
Naatsorsuinerillu naapertorlugit Qaqortumi nunap immikkoortuani mittarfik aningaasatigut imminut napatissinnaassanngilaq Namminersorlutilli Oqartussanit tamakkiisumik aningaasalersugaalluni ingerlanneqartussaassalluni.
Nuummi Ilulissanilu Atlantiku qulaallugu timmisartunut mittarfissat nutaat aningaasatigut imminnut napatissinnaasussatut naatsorsuutigineqartut sanaartornissaannut danskit naalagaaffiat aningaasaleeqataanissamik neqerooruteqarpoq.
Periarfissat annertuut, naatsorsuisoqaranili
Inerniliineq Qaqortumi nunap immikkoortuani mittarfiliornissamik pilersaarutigineqartumut Inatsisartuni amerlanerussuteqartut tapersersugaannut akerliuvoq.
Misissueqqissaarneq naapertorlugu Kommune Kujallermit nuuttut 2011-miilli 11,6 procentiupput - nunatsinni kommunit tallimaasut akornanni amerlanerpaajullutik. Kujataanilu silaannakkut angalannerup aaqqissugaanera allanngortinneqanngippat noorartoqaannassaaq, Kommune Kujallermilu innuttaasut 2030-mi 5.700-ssangatinneqarlutik - innuttaasut ullumikkumut naleqqiullugit 850-inik ikileriarsimassallutik, misissueqqissaarnermi tamanna allassimavoq.
AAMMA ATUARUK Mittarfiit kittaarlugit sanaartorneqartariaqarput
Qaqortumili Islandimit, Savalimmiunit, Canadap kangisissortaanit USA-milu New Englandimi naalagaaffinnit Atlantiku qulaallugu timmisartunut toqqaannartumik tikinneqarsinnaasumik mittarfiliortoqarpat, tamanna pinngitsoortinneqarsinnaavoq.
Misissueqqissaarnermi naapertorlugu Atlantiku qulaallugu timmisartunut Qaqortumi mittarfiliortoqarneratigut 2040-mi mittarfimmi piffissaq tamakkerlugu sulisorisat nutaat 11-23-nik amerlassuseqassapput, assersuutigalugulu Kommune Kujallermi ilaatigut takornariartitsinerup, aalisarnerup piiaaveqarnerullu iluanni suliffiit toqqaannanngitsumik pilersinneqartut 80-165-iussallutik.
AAMMA ATUARUK IA: Nuummi mittarfik siulliunneqassaaq Kangerlussuarlu ineriartortinneqarluni
Assersuutitullu, Qaqortumi nunap immikkoortuani mittarfiliortoqarpat piffissaq tamakkerlugu sulisorisat pingasuussapput suliffiillu toqqaannanngitsumik pilersitat 2040-mi 15-it tungaannut amerlassuseqassallutik, naliliinermi tamanna oqaatigineqarpoq.
Borgmesteri siunnersuummut tigussaasumut tapersiinngitsoq
Misissueqqissaarnerli immikkuualuttunik pingaarutilinnik arlalinnik amigaateqarpoq. Assersuutigalugu Qaqortumi nunap immikkoortuani mittarfiliorani Atlantiku qulaallugu timmisartunut mittarfiliortoqassappat tamatumunnga aningaasartuutissat qanoq amerlatigissanersut ilanngunneqarsimanngilaq.
Aamma Atlantikup avannaaliartaatinut nunallu immikkoortuani mittarfiup assigiinngissutaat oqaatigineqanngilaq, mittarfiimmi pineqartut takisussii tamarmik 1.500 meteriummata.
Aamma Atlantiku qulaallugu timmisartunut mittarfiliornermi ineriartorneq pillugu naatsorsuinerit Islandimi Savalimmiunilu ´00-ikkunni Atlantiku qulaallugu mittarfiliortiternerit kingorna ineriartortoqarneranik tunngaveqarput.
Borgmesterillu Kiista P. Isaksenip Kommune Kujalliup tusagassiorfinnut nalunaarutaani Qaqortumi mittarfiliortoqarnissaanut tapersersuinini oqaatigiinnarpaa.
Borgmesteri misissueqqissaarineq pillugu qanoq isumaqarnersoq, Qaqortumi nunap immikkoortuani mittarfiliornissaq imaluunniit Atlantiku qulaallugu timmisartunut mittarfiliornissaq tapersersorneraa pillugu KNR-imit oqaaseqartinniaraluaratsigu KNR-imit saaffiginnissutivut akissuteqanngilaq.
AAMMA ATUARUK Qaqortumi mittarfiliornissap suli attanneqarnera Kielsenip naqissuseraa
