Qaqortumi mittarfiliornissap suli attanneqarnera Kielsenip naqissuseraa
Kim Kielsen Qanoruumi ataasinngornermi apersorneqarluni taama oqarpoq.
- Uani mittarfissuarnut tunngatillugu suliaq 2015-imili aallartippoq, 2016-imilu Kalaallit Airports pilersinneqarpoq. Kalaallit Airports tassaavoq mittarfinnik taakkuninnga pingasunik sanasussaq, Qaqortoq ilanngullugu. Aamma ulloq manna tikillugu Qaqortoq ilaavoq. Taamaattorli uani massakkut aningaasaliinissamut tunngatillugu mittarfiit marluk aningaasalersorneqassapput. Qaqortumut tunngassuteqartoq, tassa uagut inuiaqatigiit nammineerluta akilissavarput. Peqataatinneqarput, issiaqataapput naalakkersuisut akornanni, Naalakkersuisut siulittaasuat oqarpoq.
Nuummi Ilulissanilu mittarfiit tallilerneqarnissaannut atatillugu naalagaaffiup 700 milliuunit koruunit aningaasaliissutigissallugit piareersimavoq, tamatumali malitsigisaanik naalagaaffik 33,3 procentimik piginnittussaaq.
AAMMA ATUARUK Løkke Nuummi Ilulissanilu mittarfinnik piginneqataarusuttoq
Tamatuma saniatigut naalagaaffiup Nordiske Investeringsbank aqqutigalugu 450 milliuunit koruuninik
qularnaveequsiissaaq, taamaalilluni Nunarput erniakitsumik atorniarsinnaaniassammat. Aningaasalli taakkuinnaanngillat - Danmarkimmi Nunarput 450 milliuunit koruuninik tassa erniakitsumik aamma atukkerumavaa.
AAMMA ATUARUK Aningaasaqarnermut ataatsimiititaliap Kim Kielsen ataqqinninngineraraa
Nunatsinni mittarfiliortiternissamut aningaasalersuinissaq akikinnerusoq, Kim Kielsenip Lars Løkke Rasmussenillu atsioqatigiinneranni eqqanaarneqarpoq, taamaalilluni Kalallit Airports A/S nunani tamalaani aningaasanik atorniartarfinnut atorniartussaajunnaarpoq.
Mittarfinnullu suliaq sukumiisumik suliaasoq, Kim Kielsen oqarpoq.
- Tassa oqarsinnaavunga sukumiisumik suliarineqarpoq, taavalu apuussassaq Inatsisartunut ingerlasussaalluni. Tassa imaappoq aningaasaqarnermut inatsisissamut piginnaatitsissut 2018-imoortoq taanna pissarsiarereernikuuara Inatsisartuninngaanniit, kontut qiviaannarneqarsinnaapput, Naalakkersuisut siulittaasuat oqarpoq.
