Aningaasaqarnermut ataatsimiititaliap Kim Kielsen ataqqinninngineraraa
Aningaasaqarnermut Akileraartarnermullu ataatsimiititaliap isumaqatigiissut ministeriunerup Lars Løkke Rasmussenip Naalakkersuisullu siulittaasuata Kim Kielsenip atsioqatigiissutigisassaat pillugu paasitinneqarumalluni Kim Kielsen siunersuinissamut ataasinngormat aggersaraluarpaa. Kim Kielsenilli Lars Løkke Rasmussenimik tikeraartoqarnini pissutigalugu tamatumunnga periarfissaqannginnerarpoq.
Ataatsimiititaliap mittarfiliortiternissaq pillugu siunnersuummik upernaarli suliaqartup, isumaqatigiissutip imarisaanik ilisimatinneqarsimannginnini sakkortuumik isornartorsiorpaa.
- Isumaqatigiissutip atsiorneqannginnerani imarisaanut isummerfiginninnissamut periarfissinneqannginneq ataatsimiititaliamit naammagineqanngilluinnarpoq, ataatsimiititaliap siulittaasua Hermann Berthelsen (S) tusagassiorfinnut nalunaarummi, Løkkep Kielsenillu isumaqatigiissummik atsioqatiginnissaat sioqqutilaarlugu nassiunneqartumi, taama allappoq.
Kielsenip isumaqatigiissummik atsioqatigiissuteqannginnissaa ataatsimiititaliap tusagassiorfinnut nalunaarummi kaammattuutigaa. Taamatulli kaammattuuteqartoqarnera Naalakkersuisut siulittaasuata malinngilaa.
AAMMA ATUARUK Løkke Nuummi Ilulissanilu mittarfinnik piginneqataarusuttoq
Aningaasaqarnermut Akileraartarnermullu ataatsimiititaliap mittarfiiliortiternissaq pillugu siunnersuut Inatsisartut ukiaanerani ataatsimiinneranni suliarineqartussaq Inatsisartut upernaakkut sivikitsuinnarmik ataatsimiinnerisa kingornali suliaraa. Kim Kielsenilu danskit ministeriunerannut isumaqatigiissuteqarnerminut atatillugu ataqqinninnginnerarpaat.
- Ataatsimiititaliap akulilutsinneqannginnera suliassamut, mittarfissat pillugit inatsisissatut siunnersuummik ataatsimiititaliamut innersuussinikkut, Inatsisartunit suliakkiunneqartumut ataqqinninnginnertut taamaallaat paasineqarsinnaavoq, Hermann Berthelsen taama allappoq.
