SIK Mittarfiit kittaarlugit sanaartorneqartariaqarput

Sulinermik Inuussutissarsiuteqartut Katttuffiat SIK mittarfiliortiternissat pillugit oqallinnermut akuliuppoq.

Mittarfiit kittaarlugit tallilerneqarnissaat SIK-p orniginartinneruaa, mittarfeqarnermi suliassat kittaarlugit ingerlanneqarnissaat kissaatigalugu. Sulisussaqarniarneq matumani eqqarsaatigisariaqartoq SIK isumaqarpoq, sulisartullu nunaqavissut sapinngisamik annertunerpaamik peqataatinneqarnissaat SIK-p ujartorpaa.

SIK-p siulittaasua Jess G. Berthelsen tusagassiutinut nalunaarummi taama ilaatigut oqarpoq.

Inatsisartut mittarfiliortiternissat sioqqullugit eqqarsarluaqqaarlutik aalajangiisariaqartut, Jess G. Berthelsen isumaqarpoq. Qanorluunniimmi aalajangertoqassagaluarpat aalajangiussat inuiaqatigiinnut akuuffigisatsinnut pitsaaquteqarlutillu ajoquteqartussaasut nunarput ataatsimut isigissagaanni, SIK-p siulittaasua oqarpoq.

Jess G: Mittaarfiit kittaarlugit sananeqarnerat akikinnerussaaq

Qaqortumi, Nuummi Ilulissanilu mittarfiit kittaarlugit sanaartorneqartariaqartut SIK isumaqarpoq:

- Kialluunniimmi takorloorsinnaavaa ataatsikkorsuaq sananeqassappata avataaniit sulisussanik annertoorujussuarmik tikisitsisariaqassasugut, Jess G. Berthelsen oqarpoq.

Mittarfiliortiternerit kittaarlugit ingerlanneqartariaqartut taanna isumaqarpoq, akikinnerussammammi:

- Tamatuma akinut pitsaanngitsumik annertuumik sunniuteqarnissaa naatsorsuutigineqartariaqarpoq sanaartorneq nalinginnaasoq aamma sumiiffinni ingerlanneqassapppat, Jess G. Berthelsen oqarpoq.

Kielsen nersualaarpaa

Naalakkersuisut siulittaasuata Kim Kielsenip mittarfiliortiternissat pillugit naalagaaffiup aningaasaleeqataanissaanut isumaqatigiissusiornera, taassuma nersualaarpaa, soorlu aamma amerikamiut aningaasaleeqataaniarlutik neqeroorutaat qinikkanit akorluarneqartariaqartoq oqaatigigaa.

- Tamanna immaqa aamma Kangerlussuup mittarfittut ataannarnissaanut iluaqutaasinnaammat, SIK-p siulittaasua Jess G. Berthelsen oqarpoq.