IA: Nuummi mittarfik siulliunneqassaaq Kangerlussuarlu ineriartortinneqarluni

Angallannikkut allannguisariaqarpugut - isumatusaarnerusumik periaaseqarnissamut siunnersuusiaq qulequtaralugu Inuit Ataqatigiit mittarfiit pillugit oqallinnermi ullumi saqqummiipput.
septembarip 13-at 2018 11:16

- Sanaartornerit ataatsikkoortinneqassanngillat. Nuummi mittarfik siulliullugu sanaartorneqassaaq. Suliffeqarnerup iluani angummassinnaajunnaartoqarsinnaanerata mianersuuttariaqarnera tamatumunnga pissutaavoq. Nunatsinni sulisinnaasut amerlanerusut sanaartornermi atorneqarnissaat kissaatigaarput, Sara Olsvig oqarpoq.

Nuummi mittarfik 2200 meteriussaaq.

- Nuummi mittarfiliornikkut Nuummi ineriartortitsisoqarnissaa nunatta pisariaqartippaa, Sara Olsvig oqarpoq.

Partiip aamma nalunaarutigaa Kangerlussuarmi mittarfiup matuneqarnissaa kissaatiginagu, Qeqqatali Kommunia suleqatigalugu ineriartortinneqassasoq.

Ilulissani mittarfik 2200 meteriussanngilaq

Sara Olsvigip tusagassiortunik katersortitsinermi oqaatigaa Ilulissani mittarfiup inissimaffissaani nutaami tallilerneqarnissaa kissaatigalugu. Aallaqqaammulli 2200 meteriussanngilaq. Mittarfiulli kingusinnerusukkut 2200-mut tallillerneqarsinnaanera qulakkeerneqassaaq.

Inuit Ataqatigiit Ilulissani umiarsualiveqarneq aamman pitsaanerulersikkusuppaa, Sara Olsvig oqarpoq.

Kujataanilu Qaqortumi mittarfiup taasissutigineqannginnerani sukumiinerusumik misissuiffigineqarnissaa partiip kissaatigaa. Sara Olsvigip oqaatigaa mittarfiup tikikkuminassusiata 80 procentiunera Inuit Ataqatigiinnut naammanngitsoq.

Kingullertullu Inuit Ataqatigiit kissaatigaat illoqarfinni arlalinni ujaraaqqanik mittarfiliassanik misissueqqaarnerit ingerlatiinnarneqassasut. Tamatumani Narsaq, Qasigiannguit, Qeqertarsuaq, Kangaatsiaq, Nanortalik Ittoqqortoormiillu pineqarput. Tasiilami mittarfiliortoqarnissaanut misissueqqaarnerit ingerlanneqarnissaat partiip aamma kissaatigaa.