Atassut: IA-p siunnersuutaa piviusorsiortuunngilaq
Siunnersuutip piviusorsiunnginneranut tutsuiginnannginneranullu pissutaavoq, naalagaaffimmit tapiissutit ukiumut 50 million kr-nik ikinnerulertarmata, aningaasat Kalaallit Nunaanni nalikillinerusarmata qallunaat nunaannut sanilliulugu.
Atassutip siulittaasuata tullia Steen Lynge tusagassiuutinut nalunaaruteqarluni taama allappoq - nangillunilu
Naalagaaffiup ataatsimut tapiissutaasa ukiumut 10 million kr-nik ikilisinneqarnissaanik IA oqallinnissamik siunnersuuteqarpoq ukiortaami oqaaseqarnermi, Kalaallit Nunaat nammineerluni namminiilivinnissamut alloriarniassammat.
Aamma atuaruk Inuit Ataqatigiit siunnersuutertik aalajangiusimavaat
10 million kr-nit suminngaanit pissarsiarineqassanersut partiinit allanit paaserusunneqarput, taassunga IA akissuteqarluni oqarpoq, siunnersortit nunatta avataaneersut sipaarutigineqarsinnaasut nunatsinnilu imminut pilersuinerulernikkut.
Aamma atuaruk Tapiissutit ikilisinneqarnissaannut Siumumit akerlerineqarpoq
Taanna pillugu Atassutip siulittaasuata tullia Steen Lynge ima allapoq.
- Neqinik naatitanillu tunisassiorneq arriitsumik ineriartortinneqarpoq taakkualu tunisassiarineqartarnerat Kalaallit Nunaannut iluanaarutaassanatik.
Siunnersortit nunatta avataaneersut atorneqartarput Kalaallit Nunaanni pikkorissunik piginnaasalinnik piffinni arlalinni amigaatigineqarmata.
- Piginnaasalinnik pikkorissunik amigaateqarneq piffissami sivisuumi atuutissaaq piffissallu ingerlanerani pisariaqarluinnarpoq ilinniartitaanermut ileqqaaruteqarluarnissaq. Tamanna aningaasanik pisariaqartitsivoq, Steen Lynge allappoq.
Aamma atuaruk Ataatsimoortumik tapiissutit ikilisikkiartuaartinnissaat Demokraatit isumaqatiginngilaat
Steen Lynge isumaqarpoq, IA taamatut siunnersuuteqarnermikkut akissarsiaqqortornerit akileraarnerusalernissaat anguniarneqartoq.
- Taamatut IA-miit siunnersuuteqarneq aningaasatigut matussuserlugu aaqqiffissaa tassatuaavoq progressiv aqqutigalugu akileraartitseriaatsip eqqunneratigut, Steen Lynge allappoq.
- IA piareersimava nunatta pisariaqartitai tunulliutissallugit, piviusunngortinniaannarlugu inuiaqatigiit inuussutissarsionerat qullersanit aqunneqartoq? Atassutip siulittaasuata tullia Steen Lynge tusagassiuutinut nalunaarummi taama aperivoq.