Tapiissutit ikilisinneqarnissaannut Siumumit akerlerineqarpoq
Danmarkimit tapiissutinik ukiumut 10 millionit koruuninik apparsaasoqarnissaanik Inuit Ataqatigiit ukiortaami oqaaseqaataanni siunnersuuteqarmata, Demokraatit siulittaasuat Randi Vestegaard Evaldsen naaggaarujussuarpoq. Siumullu Demokraatinut isumaqataapput.
- IA-p bloktilskudit suli ikilisarniarpai, tamannalu imminut ataqatigiinngilluinnarpoq, Demokraatit siulittaasorigallagaat, Randi Vestergaard Evaldsen taama erseqqitsigisumik oqariartuuteqareerpoq.
Aamma atuaruk Ataatsimoortumik tapiissutit ikilisikkiartuaartinnissaat Demokraatit isumaqatiginngilaat
Siumumilu politikkikkut oqaaseqartartoq Jens-Erik Kirkegaard Danmarkimit tapiissutit ikilisinnissaannut aamma isumaqataanngilaq.
- Nalunngilarput, inuuniarnermi aningaasartuutit annertusiartornerata nalaaniippugut. Ukiuni aggersuni aningaasaqarnerput sakkortuumik unammillerfiuvoq, taamaammat Inuit Ataqatigiit ukiortaami sassaalliutaat, Siumuminngaanniit tapersersinnaanngilarput, Jens-Erik Kirkegaard oqarpoq.
Namminersulivinnissamut qimuttut
Taassuma aamma erseqqissarpaa, inuit akissarsiaat nioqqutissanut, ineqarnermut akiligassanut allanullu malinnaaniapiloortut, taamatullu aningaasat pisissutaasinnaasut ikiliartorlutik.
Namminersulivinnissaq eqqarsaatigalugu, Nunatta tapiissutit ikilinerisigut akisussaaffimmik tigusineranik takussutissaqarsinnaasoq, Inuit Ataqatigiit isumaqarput.
Aamma atuaruk Ataatsimoortumik tapiissutit ikilisarnissaat IA-p siunnersuutigigaa
Siumup namminersulivinnissaq aamma piumasarigaa, Jens-Erik Kirkegaardip erseqqissarpaa. Tamannali mianersorluni anguniagassaasoq, Jens-Erik Kirkegaard isumaqarpoq.
- Namminiilivinnissap tungaanut qimuppugut. Bloktilskudi taamatut isikkoqarluni paarnaassasoq, inuiaqatigiit 2008-mi taasinikuupput. Aammalu nalunngilarput ukiut tamaasa annertuumik millionilikkaanik naleerukkiartortoq. Inuiaqatigiit qaavatigut artukkersussagutsivigit, aningaasartuutigullu qaffakkiartortut, politikki taanna ataqatigiinngilaq, Jens-Erik Kirkegaard oqarpoq, ilanngullugulu oqarluni, Inuit Ataqatigiit siunnersuutertik sumit akilersorneqassanersoq ersersittariaqaraat.
