Ataatsimut isigalugu: Kalaallit qinigassanngortittut qineqqusaarutaallu aaku
Inuit Ataqatigiit:
Folketingimut 2015-imi ilaasortaasimasoq Aaja Chemnitz qinigassanngorteqqippoq. Taanna folketingimut kingullermik 2019-imi qinersisoqarmat nunatsinni taaguunneqarnerpaavoq – tassanilu 5.686-init taaguunneqarluni.
IA-mit Aqqalukkuluk Fontain aamma Arnâránguak Inusugtok Rohde aamma qinigassanngortipput.
IA-p isumaginninnermut tunngasut qineqqusaarutigaa: Danmark nunatsinni kinguaassiutitigut atornerluisoqartarneranik pinaveersaartitsinermut 50 millionit koruuninik ukiuni aggersuni immikkoortitseqqissaaq.
Assi: Jens-Peter Kreutzmann/ KNR
Aningaasat taakku illoqarfinni meeqqat angerlarsimaffiinut pisariaqartinneqartunut aamma atorneqassapput. Tassa meeqqat angerlarsimasinnaanngikkunik angerlarsimarusunngikkunilluunniit orniffiit unnuiffigisinnaasaat.
Kingullermik 2019-imi juunimi qinersisoqarmat Aaja Chemnitz IA-mit qinigaavoq.
Taanna 5.686-init taaguunneqarpoq.
Aki-Matilda Høegh-Dam 3.467-init taaguunneqarpoq.
Peqqinnissaqarfik aamma pingaarnerpaatinneqarpoq. IA-p kalaallit Danmarkimi peqqissarnissaanut periarfissagissaarnerulersikkusuppai.
Kalaallit innuttaasut Københavnimut taarsiullugu napparsimmavimmi sorlermi soorlu Aalborgimi Vejlemiluunniit peqqissarnissaq pitsaanerullunilu sukkanerususinnaappat imaluunniit qanittuani qanigisaqarunik aalajangersinnaassavaat.
Siumut:
Fire folketingskandidater stiller op. Det er Aki-Matilda Høegh-Dam, som har siddet på Christiansborg siden valget i juni 2019.
Folketingimut qinigassanngortittut sisamaapput. Aki-Matilda Høegh-Dam 2019-imi juunimili Christiansborgimiittoq qinigassanngorteqqippoq.
Palasiusimasoq, Markus E. Olsen, Karina Zeeb aamma Elvira Kuitse aamma qinigassanngortipput.
Siumumit folketingimut qinersinissamut nunatsinni inuit inuunermi atugaat pingaartumik salliutinneqarput.
Assi: KNR
Partiip suleqatigiinneq inunnut aningaasatigut iluaqutaasinnaasoq kissaatigaa – pingaartumik Ukrainemi sorsuttoqarnera pissutigalugu.
Tamatuma saniatigut nunasiaataaneq aamma qineqqusaarutini ilaavoq.
- Danskit naalagaaffiata nunasiarinnissimanerata kingunerlutsisisimaneranik nassueruteqarnera soorunami nuannaarutigaarput. Kingunerlutsissisimanerali assuareqaarput. Nunasiaasimanermullu tunngasut iIliuuseqarfigineqartariaqarlutillu naammassineqartariaqarmata qineqqusaarnermi pingaartitatsinnut ilaapput, Erik Jensen Siumup qineqqusaarnermi pingaartitatik pillugit oqarpoq.
Naleraq:
Peqqinnissamut naalakkersuisuusimasoq, Kiista Fencker aamma Juno Berthelsen qinigassanngortipput.
Assi: Jakob Larsen/KNR
Naleqqamit susassaqarfiit nunatta akisussaaffigisai atukkavut aallaavigalugit naleqqussartariaqarsorai.
- Inatsisit ilarpassui danskit naalagaaffiata atuutilersissimasai pisoqaavallaalersimapput. Taakku ullutsinni atukkatsinnut naleqqussarlugit nutarterneqartariaqarput, Kiista Fencker oqarpoq.
- Nunatta naalagaaffinngornissaanut, kalaallillu immitsinnut aallaavigiuarnissatsinnut Naleqqap ersarissumik anguniagaqarneranut tapersersuillunga, politikikkut suleqataarusullunga sassarpunga, Kiista Fencker, tusagassiutinut nalunaarummi oqarpoq.
Juno Berthelsenip nunatta naalagaaffinngornissaa taassuma aamma sulissutigerusuppaa.
- Inuiattut pisinnaatitaaffigut qulakkeerniarlugit politikkikkut pimoorussillunga sulissutigerusuppakka. Inuiattut kinaassuserput Naalagaaffinngornissarpullu qitiutillugit Naleraq sinnerlugu politikkikkut suleqataanissaq piareerfigalugu sassarpunga, Juno Berthelsen oqarpoq.
Atassut:
Arnanguaq Jeremiassen aamma Aviaq Kleist qinigassanngortipput.
Atassummi peqqinnissaq pingaartuutinneqarpoq.
Peqqinnissamut oqartussaaffik danskit akisussaaffigileqqissagaat Atassut isumaqarpoq.
Naak peqqinnissamut oqartussaaffik nunatta ukiut 30-t matuma siornali akisussaaffigilereeraluaraa suliassaq tamanna nunatta kisimi kivissinnaanngikkaa, Atassutip siulittaasua, Aqqalu Jerimiassen isumaqarpoq.
- Peqqinnissaqarfipput Naalagaaffimmut utertinneqartariaqarpoq. Annaasaqartarnerput naammalerami. Ilaquttatsinnik asannititsinnik qanigisatsinnik annaasaqartarnerput. Sullissineq kipiluttunarpallaarami, Aqqalu Jerimiassen.
Demokraatit:
Anna Wangenheim Demokraatinit kisiartaalluni qinigassanngortippoq. Taanna peqqinnissamut naalakkersuisuunikuuvoq peqqissaasutullu ilinniarsimasuulluni – peqqinnissaqarnerlu partiimit pingaarnerpaatinneqarpoq.
Partiip peqqinnissaqarfimmi sulisussanik avataaneersunik tikisitsinissap ajornaannerulersinneqarnissaa kissaatigaa.
Assi: Demokraatit
Taassuma peqqinnissaqarfiup danskinit akisussaaffigineqaleqqinnissaa sulissutiginianngilaa.
- Isumaqatiginngilarput. Aamma pissutigalugu Danmarkimi sulisoqarniarnermut ilungersunartorujussuarmik inissisimareermata, taamaattumik piviusorsiortutut isiginngilara, taanna KNR-imut oqarpoq.
Tamatuma saniatigut silap pissusia nunatsinnilu Pinerluttunik Isumaginnittoqarfik aamma ukkatarineqarput:
- Pinerluttunik Isumaginnittoqarfik pitsanngorsarneqartariaqarpoq. Isumaqatigiissusioqqinnerimmi pinerluuteqarsimasunut inissiisarfinni nakkutilliisut kisimik akissarsiaasa aappaagu qaffanneqarnissaannik qulakkeerutaanerat ajorpoq. Inuillumi pinerluuteqarsimasunullu inissiisarfimmiittut tamarmik aamma eqqarsaatigisariaqarpagut. Taakkumi siunissami sussappat? Taakkulu inuiaqatigiinnut ilaalerseqqinnissaat qulakkeertariaqarpoq, Folketingimut qinigassanngortittoq Demokraatineersoq Anna Wangenheim oqarpoq.
Samarbejdspartiet:
Tillie Martinussen qinigassanngortittuuvoq.
Assi: Scanpix
Suleqatigiissitsisut Inatsisartuni qinigaatitaqanngillat – partii ukiut marluk affaata matuma siorna qinersinermi isertitaqanngilaq.
- Nunatsinni soraarnerussutisiutit Danmarkimi, Sverigemi Norgemilu utoqqalinersiutitulli amerlatigilersillugit nalimmassarneqartariaqarput.
- Nunattalu inuisa akornanni napparsimasut tarnikkulluunniit nappaatillit Danmarkimut noorarnerat ingalassimaniarlugu Danmark aamma suleqatisererusupparput.
