Naleraq folketingimut marlunnik qinigassanngortitsisoq
Naleqqalli qinigasssanngortitani maanna saqqummiuppai. Nalerarmi sinnerlugu sassartut marluupput. Sassartut marluk partiip siulersuisuunerinut ilaasortaapput. Sassartut tassaapput Kiista Fencker, Naleqqap Inuit Ataqatigiit peqatigalugit naalakkersuisoqatigiinni ilaasortaanerani peqqissutsimut naalakkersuisuusimasoq, kiisalu Juno Berthelsen, Naleqqqami ulluinnarni aqutsisuni qinikkatut sulisoq.
Kalaallit Nunaata naalagaaffinngornissaa Kiista Fenckerip sulissutiginiarpaa:
- Nunatta naalagaaffinngornissaanut, kalaallillu immitsinnut aallaavigiuarnissatsinnut Naleqqap ersarissumik anguniagaqarneranut tapersersuillunga, politikikkut suleqataarusullunga sassarpunga, Kiista Fencker, tusagassiutinut nalunaarummi oqarpoq.
AAMMA ATUARUK Folketingimut qinigassanngortittut kikkuuneri partiit isertuuppaat
Sassartut aappaat tassaavoq Juno Berthelsen. Taanna naalakkersuisoqarfimmi maanna atorfeqarpoq, Naleqqamilu ulluinnani aqutsisuni qinikkatut sulilluni.
Kalaallit Nunaata siunissaq ungasinnerusoq eqqarsaatigalugu naalagaaffinngornissaa taassuma aamma sulissutigerusuppaa:
- Inuiattut pisinnaatitaaffigut qulakkeerniarlugit politikkikkut pimoorussillunga sulissutigerusuppakka. Inuiattut kinaassuserput Naalagaaffinngornissarpullu qitiutillugit Naleraq sinnerlugu politikkikkut suleqataanissaq piareerfigalugu sassarpunga, Juno Berthelsen oqarpoq.
Qinersisoqarnissaanut suli ulluliisoqanngilaq
Partiip Danmarkimi naalakkersuisunut tapersersuisup Radikale Venstrep, ministeriunermut Mette Frederiksenimut pinngitsuugassaanngitsumik piumasaqarnera pissutaalluni Folketingimut qinersisoqarnissaa suli nalunaarutigineqarnikuunngikkaluartoq qineqqusaartoqalereerpoq.
Qinersisoqarnissaanut kingusinnerpaamik oktobarip ulluisa sisamaanni nalunaaruteqarit, Folketingimmi sulinerata ukiua tassani aallartissaaq, taamaaliunngikkuillu Radikale Venstre naalakkersuisunut tapersersuiunnaassaaq.
Radikale Venstre naalakkersuisunut tapersersuiunnaarpat, naalakkersuisut ikinnerussuteqalissapput qinersisoqartariaqassallunilu.
Coronap ajornartoortitsinerata nalaani uumasuutit minkit toqorarneqarnissaannut aalajangiisoqarnera pillugu suliami Radikale Venstre taama piumasaqaateqarpoq. Minkit pillugit ataatsimiititaliarsuup misissuinerata kingorna Radikale Venstre ministeriunermut Mette Frederiksen tapersersuiuarsinnarpoq, kisianni tassa Folketingip suleqqilernissaata tungaanuinnaq.
AAMMA ATUARUK Søren Pape Poulsen Danmarkimi ministeriuninngorusuttoq
Folketingimullu qinersisoqarnissaanut kingusinnerpaamik oktobarip ulluisa sisamaannni nalunaarutigineqarnissaa politikerit tusagassiuutillu taamaammat ilimagaat.
Naallu qinersisoqarnissaanut ullualunnguit sioqqullugu aatsaat taamaaliortoqartartoq Mette Frederiksen, Venstrep siulittaasua Jakob Ellemann-Jensen, Det konservative Folkepartillu siulittaasua Søren Pape Poulsen siulittaasutut DR-imi oqallitsinneqareerput.
Naleqqap Folketingimut qinigassanngortitaasa marluk saniatigut Inuit Ataqatigiit maanna ilaasortaatitaata Aaja Chemnitzip qinigassanngorteqqinniarnini nalunaarutigereerpaa.
