Folketingimut qinigassanngortittut kikkuuneri partiit isertuuppaat

Folketingimut ullumikkut qinersisoqassagaluarpat taasivissami toqqagassaq ataasiinnaassagaluarpoq, tassalu Aaja Chemnitz Driefer Inuiat Ataqatigiinneersoq. 

Taanna nunatsinnit Folketingimut qinigassanngortinnerminik maannamut kisartaalluni nalunaaruteqarpoq, pIngajussaa qinigassanngortilluni.

AAMMA ATUARUK Folketingimut qinersisitsisoqalertorooq: Aaja Chemnitz pingajussaanik qinigassanngortinniartoq

Partiimmi sinnerisa tamarmik qinigassanngortitatik suli isertuuppaat. Tamarmimmi siulersuisuunerit qinitassanngortittunik akuersinissaat suli utaqqivaat. 

- Qinersinisaq suaarutigineqarpat saqqummiutissavagut, partiit siuttui tamangajammik nalunaarput. 

Folketingimut ukiamut qinersisoqarnissaa Danmarkimi ilimagineqarpoq. Folketingimi oktobarip sisamaani ammaanermi ministeriuneq Mette Frederiksen qinersinissamik suaaruteqanngippat, Radikale Venstre naalakkersuisoqatigiinnik uppisitsinissamik sioorasaaripput. 

Taamaammat danskit partiivi pisortatigoortuunngikkaluamik qineqqusaalereerput, qineqqusaarutinik nivinngagassanik, allakkanik neriorsuutinillu piareersimatitsillutik. 

'Taama periuseqarpugut' 

Qinigaaffik qiteqqutiinnartoq Danmarkimi partiit qinigassanngortitassatik amerlanerit toqqareertarpaat. Taamaalillutik partiit qineqqusaartussallu qinequsaarnissamut piareersarnissaminnut piffissaqarluartarput. 

Siumumit qinigassanngortittussat piareersimasut, partiip siulittaasua Erik Jensen oqarpoq. Taakkuli qinersinissamik suaaruteqartoqareerpat siulersuisuunernit akuerineqarumaartut oqaatigaa. Taama periuseqartut, Erik Jensen paasissutissiivoq. 

Qinersinissamut piareersimalluarlutik Atassutip siulittaasua Aqqalu Jeremiassen oqarpoq. Qineqqusaartussat allassimaffiat immaqa septembarip aallaqqaataani saqqummiunneqarumaartoq oqaatigaa. Qanorli amerlatiginersut oqaatigerusunngilaa.

Demokraatit qinigassanngortitassaasa kikkuuneri qanorlu amerlatigineri partiip siulittaasuata Jens-Frederik Nielsenip aamma oqaatigerusunngilaa. 

Naleqqap sulittaasuata Pele Brobergip kisiartaalluni KNR-imut oqaatigaa Folketingimut qinigassanngortitassatik marluusut, arnaq angullu, kikkuunerili suli oqaatigerusunngilaa. 

Atlantikup avannaaniittut pissaanermik aalajangiisuusinnaasut

Sermitsiaq.ag-p aaqqissuisuunera pisortaaneralu naapertorlugu, paartiit qinigassanngortitaminnik qinersinermik suaartuteqarnerup kingorna saqqummiiniarnerat "pisarnertut innarpoq".

Folketingimut qinersineq Inatsisartunut qinersinermut sanilliullugu partiini "inikinneruvoq", taanna oqarpoq. Oqartussaaqataaneq innuttaasullu eqqarsaatigissagaanni qinigassanngortitat partiinit siusinnerujussuakkut saqqummiunneqartariaqaraluarput.

- Qinigassanngortut siusinnersukkut saqqummiunneqarpata, inuit amerlanerit tusagassiortullu qineqqusaartunit assigiinngissutit siunertat anguniakkallu assigiinngissutaannik oqallinnissaminnut saqqummiinissaminnillu piffissaqarnerussapput.

- Kipparissumik oqaatigissagaanni, taamalilluni oqartussaaqataanerup aqqani oqallinneq pikkunaallissaaq, sivisunerusumimmi oqallittoqarpat ajunnginnerussaaq, Christian Schultz-Lorentzen oqarpoq.

Qineqqusaartulli sivisunerusumik qineqqusaarsinnaagunik amerlanernit taaguunneqarnissaat nalunarpoq.

AAMMA ATUARUK Danmarkimi naalakkersuisut ikorfartortaasalu ministeriuneq naveeraat

Nunatsinniilli Folketingimut ilaasortanngortussat pingaarutilimmik ukioq manna inississinnaanerat aaqqissuisuunerup oqaatigaa. 

Foketingimut 2019-mi qinersunerup kingulliup kingorna danskit partiivi nutaat arlalissuit pilersinneqarmata, atlantikup avannaanit politikerit pissaaneqartupilussuulersinnaapput.

- Amerlanerussuteqalernissaq anguniarlugu Danmarkimi parteerpassuit suleqatigiittariaqalersinnaapput. Taamaattoqassappallu qinikkat ikittunnguit aalajangiisunngorsinnaapput. Kalaallit Savalimmiormiulluunniit taama inississinnaapput, Christian Schultz-Loretzen oqarpoq. 

Nunatsinnit Folketingimut maanna ilaasortassut, Siumumeersoq Aki-Matilda Høegh-Dam Inuit Ataqatigiinneersorlu Aaja Chemnitz Driefer qinigassanngorteqqissagunik qinigaaqqinnissaat ilimanaateqartoq taassuma aamma nalilerpaa. Aaja Chemnitz Driefer qinigassanngorteqqinnissaminik nalunaaruteqareerpoq. 

- Maanna politikkikkut inissisimaneq takusinnaasara malillugu, qinigassanngortittumik nutaamik piukkunnartoqanngilaq, taanna oqarpoq.