Folketingimut qinersisitsisoqalertorooq: Aaja Chemnitz pingajussaanik qinigassanngortinniartoq
Naqqiissut 11. August 2022: Allaaserisami siullermi, Lars-Emil Johansen (S) qinigaaffinnik pingasunik kisiartaalluni folketingemi issiasimasoq oqaatigaarput. Eqqortorli imaappoq, Otto Steenholdt qinigaaffinnik arlalinnik folketingimi issiasarnikuuvoq. Allaaserisami tamanna naqqinneqareerpoq.
Folketingimi ukiorpaalunni ilaasortaq Inuit Ataqatigiinneersoq, Aaja Chemnitz Driefer, qinersisitsinissamik nalunaartoqareerpat qinigassanngorteqqinniarpoq.
Taanna aasaq manna katikkami Larsenimik naggateqarunnaarluni Drieferimik naggateqalertoq KNR-imut taama ilisimatitsivoq.
- Qanittukkut ilumut qinersisitsisoqassanersoq nalunarumaanngilaq. Qineqqusaarnissannulli piareersimalluinnarpunga suliallu inaarsarusutakka arlaliupput, taanna KNR-imut oqarpoq.
Folketingimut qinersisitsisoqarnissaa juulip aallartinneranili ilimagineqalerpoq.
Mette Frederiksen Folketingi oktobarip sisamaani ammaanersiortinnagu qinersisitsinissamik nalunaaruteqanngippat, Radikale Venstrekkut naalakkersuisut ikorfartukkatik uppisinniarpaat.
Radikale Venstrekkut siuttuat, Sofia Carsten Nielsen, juulip aappaani taama nalunaarpoq.
Ministeriuneq Mette Frederiksen (S) Folketingimut qinersisitsinissamik oktobarimi marlunngorneq siulleq nallertinnagu nalunaaruteqanngikkuni Radikale Venstrekkut danskit naalakkersuisuinik ikorfartuiunnaarniarlutik siusinnerusukkut nalunaarutigaat.
Danskit naalakkersuisui minkit tamarmik coronavirusip tuniluutileruttornerani toqorarneqarnissaannik naalakkiinertik pillugu minkit pillugit ataatsimiititaliarsuarmit isornartorsiorneqangaatsiareersullu, Radikale Venstrekkut taamaaliorput. Eqqartuussissuserisunullu arlaannaannulluunniit attuumassuteqanngitsunut tamanna pillugu misissuisitsinissaq pinnagu qinersisitsinissamik piaarnerpaamik nalunaaruteqaqqusipput.
Aaja Chemnitz: Suliat inaarsarusutakka amerlapput
Suliat inaarsarusutani amerlammata Christiansborgimi Folketingimut qinigassanngorteqqittariaqassalluni, Aaja Chemnitz Driefer oqarpoq.
Suliat inaarsarusutai ilaatigut naalagaaffimmi atorfilittatut nunatsinni sulisut soorlu politiit pinerluuteqarsimasunullu inissiisarfinni nakkutilliisut akissarsiaannik nalimmassaanermut meeqqallu pillugit inatsit naapertorlugu angajoqqaatut oqartussaanermut tunngapput.
Nunallu tamalaat Issittumi suleqatigiinnerannut Ruslandip Ukrainemik saassussinerata kingunerisaanik unittuupajaarsimasunut tunngasut aamma pingaaruteqarsorai.
AAMMA ATUARUK Inatsisissaq: Danmark Ruslandimut naalagaaffeqatigiit sinnerlugit pillaatitut iliuuseqarsinnaalissasoq
- Politikkikkut suliat qitiulluinnartut inaarsartariaqartut arlaqarput, uangalu misilittakkakka ilisimasakkalu tunngavigalugit nunarput sinnerlugu taakkuninnga inaarsaanissamut piukkunnarnerpaasoraanga, Aaja Chemnitz Driefer oqarpoq.
Aaja Chemnitz Driefer Folketingimut qinersisitsisoqaleriarpat tassunga pingajussaanik qinigassanngortittussaassaaq, qinigaassappallu nunatsinnit Folketingimi qinigaaffinni pingasuni tulleriisiinnarlugit ilaasortaasimasuni pingajuussaaq.
Tassa Siumumeersoq Lars-Emil Johansen, aamma Atassummeersoq Otto Steenholdt, qinigaaffinni pingasunik tulleriisiinnarlugit ilaasortaanikuupput.
Aki-Matilda Høegh-Damip qanoq pilersaaruteqarnerluni oqaatigereerusunngikkaa
Aaja Chemnitz Drieferili Foketingimut qinigaaqqissaguni nunatsinni ulluinnarni pisunut malinnaajunnaarnissaminut ernummanngilaq.
- Ulluinnarni pisut politikkikkullu pingaartitannut tunngasut malinnaavigisorujussuuakka, taanna oqarpoq nangillunilu:
- Politikkikkut unittoorsimasutut nunarsuarmi inuup arlaannaataluunniit taanavianngikkaana qularinngilara.
Aaja Chemnitz Drieferip nunatsinnit Foketingimi ilaasortaaqataata Siumumeersup, Aki-Matilda Høgh-Damip, Folketingimut qinigassanngorteqqinniarnerluni qinigassanngorteqqinniannginnerluniluunniit KNR-imut ilisimatitsissutigereerusunngilaa.
Aki-Matilda Høgh-Dam Sisimiuni, Aasianni taakkualu nunaqarfiini innuttaasunik ataatsimiisitsinerni peqataassaaq. Qanorlu pilersaaruteqarnerluni Foketingemut qinersisitsinissaq aatsaat nalunaarutigineqareerpat ilisimatitsiniarpoq.
