Siumumi Folketingimut sassartut – palasi ilisarisimasaasoq ilaavoq
Novembarip aallaqqaataani folketingemut qinersisoqassaaq.
Danskit inatsisartuini Siumut sassartitassai sisamat maanna saqqummiunneqarput. Aki-Matilda Høegh-Dam 25-nik ukiulik Christiansborgimiittoq sassaqqippoq, taanna kingorna juunimi 2019-imi qinersisoqarmat qinigaavoq.
Aamma palasi Markus E. Olsen Siumumiit sassartinneqarpoq, taanna inuiattut ullorsiornitsinni Nuummi naalagiartitsilluni qilaatersortitsinera aasap ingerlanerani innuttaasunit oqallisigineqangaatsiarpoq.
Markus E. Olsen 56-inik ukioqarpoq.
Siumumit qinigassanngortittut allat tassaapput 35-inik ukiulik, Karina Zeeb taanna ilisimatusarfimmi inatsisilerituutut bachelorimik allagaqartaqarpoq, aamma 29-nik ukiulik Elvira Kuitse taanna ilisimatusarfimmi inatsisilerituunngorniarluni ilinniartuuvoq.
Nunasiaataasimaneq inuusutissarsiornerlu
Sassartut taakku sisamat ulapissaqaat, partiimmi siulittaasuata Erik Jensenip qineqqusaarutissatut pingaarnersiugai arlaqarput. Taakkulu ima saqqummiunneqarput:
- Sorsunnerup kingunerisaanik aningaasaqarnikku inuussutissarsiornikkullu annertuunik unammilligassaqarpugut. Taamaammat tassunga sulinissarput annertuumik pingaaruteqarpoq, taanna oqarpoq.
Aamma pisimasut kingunipiluutillit iliuuseqarfigineqassasut, Erik Jensen isumaqarpoq.
- Nunasiaataasimanerup kingunipilui ilaatigut naalagaaffimminngaanniit utoqqatsernermik kinguneqartut soorunami nuannaarutigaagut. Kisianni kingunipilui nuannaarutiginngilluinnarpargut taamaammat qineqqusaarutini qulequttatut aamma taakku ilannguppagut. Iliuuseqarfigineqarlutillu naammassineqartariaqarmata.
Qinigassanngortittussat arlaqartut suli amigaataasut
Siumut sisamanik qinigassanngortitaqarpoq, Naleraq marlunnik qinigassanngortitsivoq - Kiista Fencker aamma Juno Berhelsen.
Inuit Ataqatigiinniit Aaja Chemnitz, taanna 2015-imili Folketingimiippoq. Kikkut allat qinigassanngortissanersut partiip suli saqqummiutinngilai.
Atassummiit Aviaq Kleist amma Arnánguak Jeremiassen.
Demokraatiniit Anna Wangenheim.
Folketingimut kingullermi 2019-imi qinersisoqarmat Aki-Matilda Høegh-Dam taaguunneqarluarpoq, taanna 3.467-inik taaguunneqarmat.
Folketingimut qinersinissamut ullut aqqanillit sioqqullugit nunatsinnit qinigassanngortitanik nalunaaruteqarnissamut killissarititaavoq.