Anna Wangenheim Demokraatit Folketingimut sassartitatuarigallarpat

Demokraatit Folketingimut sassartitassaat ataasinnaavoq.

Peqqissutsimut naalakkersuisuusimasoq, Anna Wangenheim, Folketingimut novembarip aallaqqaataani qinersisoqalerpat nunatsinniit Demokraatit sinnerlugit qinigassanngortissaaq.

Taanna Folketingimut qinigaassaguni anguniagassaqaqaaq.

Qulequttat aqqaneq marluk pingaartitani allattorsimallugit tusagassiortunik katersortitsinermit taanna oqarpoq.

Taakkut ilagaat peqqinnissaqarfimmut tunngasut.

- Peqqinnissaqarfimmi sulisoqarniarnikkut unammillernartumik inissisimavugut, taanna oqarpoq.

AAMMA ATUARUK Inuit Ataqatigiit Folketingemut qineqqusaartitassatik isertuukkaat

- Peqqinnissaqarfik nunatsinni Danmarkimut suleqateqarnera pitsaanerulernissaa anguniarusuppara. Napparsimasunik inunnillu sullissisut qallunaat nunaanni ilinniartoqarfiit suleqatigeqqissaarlugit ilinniaqqissinnaaneq pikkorissartuarsinnaanermut aqqutit pitsaanerunissaat, Anna Wangenheim oqarpoq.

Peqqinnissaqarfimmut oqartussaaffit Danmarkimut utertinneqassanngilaq

Taassuma nunanit allaneersunik peqqinnissaqarfimmi sulisoqarnerulernissaq sulissutiginiarpaa.

Atassut peqqinnissaqarfiup Naalagaaffimmut uterteqqinneqarnissaanik kissaateqarluni qineqqusaarpoq. Atassut Demokraatillu Inatsisartuni suleqatigiipput. Atassutilli kissaataa Demokraatit isumaqatiginngilaat. Politikkikkut iliuusissaaleqinertut nalilerpaat.

- Isumaqatiginngilarput. Aamma pissutigalugu Danmarkimi sulisoqarniarnermut ilungersunartorujussuarmik inissisimareermata, taamaattumik piviusorsiortutut isiginngilara, taanna KNR-imut oqarpoq.

Folketingimilu ullumikkut issiasut, Aaja Chemnitz (IA) aamma Aki-Matilda Høeg-Damilu Folketingimi sulineranni angusaat naammagisimaanngilai.

- Nunarput sinnerlugu folketingimiittut suleqatigiissinnannginnerat assut unammillernarpoq, pitsaanerusariaqarput, Anna Wangenheim oqarpoq.

Kina ministeriunerussava?

Demokraatit kina ministeriunertaarerusunnerlugu oqarumanngillat. Mette Frederiksenilli siuttuunera naammanngisimaanngilaat.

Taakkuami isumaqarput pineqaatissinneqarsimasunut nunatsinni inissiisarfiit politeeqarfiillu aserfallassimaqisut isiginngitsuusaarneqartut.

AAMMA ATUARUK Nunatsinni partiit Folketingimut qineqqusaarnermi pingaartitaat makkuupput

Demokraatinit sassartutuaq Inatsisartunut siorna qinersinermi partiimini qinerneqarnerpaalluni 531-nik qinerneqarpoq. Folketingemulli novembarip aallaqqaataani qinerneqassaguni Inatsisartunit sulinngiffeqarniarpoq.

Folketingemut novembarip aallaqqaataani qinersisoqassaaq.

Folketingimut qinersinissamut ullut aqqanillit sioqqullugit nunatsinnit qinigassanngortitanik nalunaaruteqarnissamut killissarititaavoq

Demokraatinit folketingemut 2019-mi qineqqusaartut sisamaapput.