Ataatsimiititaliaq aappariit meerartaarneq ajulertut ikiorserneqarnissaannut aningaasanik immikkoortitseqqusisoq

Piumassuserinngisamik meerartaarneq ajulertut - ukioq manna – ikiorserneqarnissaat qularnaarpoq. Taakkua 2025-mi aamma ikiorserneqarnissaat, peqqissutsimut ataatsimiititaliami ilaasortat arlallit qulakkeerusuppaat.

Allattoq Birgitte Kjeldsen, Ulrikke Andersen

aggustip 06-at 2024 12:12

Aappariit meerartaarneq ajulertut Danmarkimukarlutik kinguaassiorusuttunut passussisarfimmi ikiorserneqarnissamut akiuliunneqartarnissaannut 2025-mi aningaasanut inatsimmmit aamma immikkoortitsisoqassava?

Ilaqutariinnut Peqqissutsimmullu Ataatsimiititaliami ilaasortat ilaat taama aperigatsinni angerput.

- Ilaqutariit meerartaarsinnaanermut ajornartorsiuteqartut ikiorsiiffigineqarnissaat Siumuminngaanniit taperseeqataaffiginikuuarput. Politisk skal det gøres muligt for dem at få den hjælp, de har brug for, Siumumeersoq Doris J. Jensen KNR-imut oqarpoq.

Piumassuserinngisamik meerartaarsinnaanngitsunut ikiorsiisarneq pillugu suliaq naalisarlugu

Aappariit meerartaarsinnaanngitsut peqqinnissaqarfiup akiligaanik Danmarkimi IVF aamma ICSI atorlugu ikiorserneqarsinnaanerat, politikerit 2019-mi unitsippaat.

Ikiorserneqarneq 50.000 koruuneqarpoq, taakku saniatigut billitsit, unnuinerit nakorsaatillu aamma akiligassaapput.

Kalaallit Nunaanniittut angalaneq ineqarnerlu akilertalermassuk ikiorsiinermi periarfissat assigiikkunnaarnerat tunngavilersuutigalugu unitsinneqarpoq.

Piumassuserinngisaminnik meerartaarsinnaanngitsut Danmarkimi IVF-imik ICSI-imillu ikiorserneqarnissaata sanitigut angalanerit ineqarnerillu Namminersorlutik Oqartussanik akilerneqartalernissaat pillugu Inatsisartunut ilaasortaq Anna Wangenheim Demokraatinersoq 2022-mi ukiaanerani ataatsimiinnermi siunnersuuteqarpoq.

Naalakkersuisut aningaasanut inatsissatut siunnersuut ukioq kingulleq aggustimi saqqummiummassuk, Danmarkimi meerartaarniarnissamut ikiorsiinermut 8,7 millionit koruunit siunnersuummi illuartinneqarsimapput.

Aningaasalli januaarimi tammaaneqaqqilerput susoqarsimaneralu Naalakkersuisut arlaannaataluunniit nassuiarsinnaanngilaat.

Aappariilli Danmarkimi reagensglas atorlugu meerartaarniarsinnaanerannut ukioq manna aningaasaliivigineqarnissaannut 3 millionit koruunit apriilimi nassaarineqarput.

Pisariaqarpallu 5,7 millionit koruunit aamma illuartinneqarsinnaapput. Aningaasaliissutillu taakku katikkaanni aningaasanut inatsimmi 8,7 millionit koruunit tammaaneqaraluarput.

Allisiguk

Ilaqutariinnut Peqqissutsimullu Ataatsimiititaliap siulittaasuata tullia Anna Wangenheim (D) isumaqataavoq:

- Aap, tassa Demokraatit siunnersuut tamakkiisumik saqqummiunneqarmat, taperserneqarnikuummat, naatsorsuutigilluinnarparput siunissami ataavartumik taannaa atuutilernissaa, taanna oqarpoq.

Aappariinnut meerartaarneq ajulertunut ikiorsiisarnerup ataavartuunissaa tamanit taperserneqarpasikkaluartoq, ilumut ataavartunngorumaarnersoq suli nalorninarpoq.

Ataavartuussava misiliutaassavaluunniit?

Aningaasammi 2024-mi aningaasanut inatsimmit tamatumunnga immikkoortitat ukioq manna januaarimi tammaratarmata uitsataaqaaq.

Aningaasalli immikkoortitat tammaratartut qaammatialuit qaangiuttut nassaarineqaqqimmata paatsiveeruttoqaqqeriaannarpoq, ukioq mannalu ikiorserneqarnerat misileraanertut ingerlanniaritsik peqqissutsimut naalakkersuisup Agathe Fontainip (IA) oqaatigaa.

Aamma atuarukAgathe Fontainip kinguuaassiorsinnaanngitsunut millionilinnik aaqqiineq "misiliutaaneraraa"

- Pisariaqartikkatsigu misileeqqaartariaqaratta, qanoq ingerlava, arlaatigut sunik aporfeqarpa? Tamakkortai misissorluartariaqaratsigit taamaammat ukioq manna misileraanertut ingerlanniarparput, taanna KNR-imut apriilimi oqarpoq.

- Pitsaasutut ingerlaleriarpat taava aningaasanut inatsimmi 2025-mut ilanngunnissaa taamaalilluni ataavartunngorsinnaanera taamatut ikiorsiinerup ingerlanissaa eqqarsaatitsinniippoq, taanna aamma oqarpoq.

Aamma atuaruk Namminneq kinguaassiorsinnaanngitsut: Rigshospital piareeqqavoq ukiorli ataaseq piviusorsiunngilaq

Aappariinnullu meerartaarneq ajulertunut ikiorsiisarnerup aningaasanut inatsimmi ataavartumik ilanngunneqartarlernissaata sulissutiginissaa peqqissutsimut ataatsimiititaliamut neriorsuutigineqartoq, Anna Wangenheim (D) oqarpoq.

- Naatsorsuutigivara aningaasaqarnermut naalakkersuisup peqqissutsimullu naalakkersuisup isumasiorneqareermata neriorsuutigimmassuk ataavartumik taannaa pilersinneqarnissaa attanneqarnissaalu sulissutiginiarneqarnersoq. Taamaammat naatsorsuutigivarput attanneqarnissaa taanna suliniut, taanna oqarpoq.

Doris J. Jensen (S) aamma qulanngeqaaq:

- Partiitsinni siulittaasorput aningaasaqarnermut naalakkersuisoq Erik Jensen aamma taanna pillugu oqaloqatiginikuuara. Taamaattumillu una oqariartuutigivara Siumuminngaanniit piareersimavugut suleqataalluarnissatsinnut, taanna oqarpoq.

IVF aamma ICSI-mik suliaritinnerit suuppat?

IVF kalaallisut mannissaq mannissaqarfimmit peerlugu qummuattaaqqami igalaaminermi pilersitsinertut taaneqarsinnaavoq.

ICSI anisooq pitsaanngeqigaangat imaluunniit IVF atorlugu siusinnerusukkut pilersitsinermi mannissat amerlanngissimagaangata atorneqartarpoq. ICSI-mik suliarinninneq peersami cellit ataasiakkaarlugit kapuummik mannissanut ikkunneqartarput.

Tassalu Peqqissutsimut Naalakkersuisoqarfiup qanorpiaq pisoqarnissaanik nalunaarnissaa amigaataaginnalerpoq.

Aappariinnut meerartaarneq ajulertunut ikiorsiisarneq ukioq manna misileraataasuusoq aningaasanut 2025-mi inatsisissami ilanngunniarneritsik, peqqissutsimut naalakkersuisoq Agathe Fontain (IA) oqaloqatigigatsinni aperaarput.

Tamanna pillugu allaatigisarput knr.gl-imi aqagu atuarsinnaavat.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.