Astrid Krag nunatsinni: Meeqqat pingaarnerupput
Danskit inunnik isumaginninnermut utoqqarnullu ministeriat Astrid Krag maanna nunatsinniippoq.
Taassuma nunatsinni meeqqanut, inuusuttunut ilaqutariinnut peqqissutsimullu naalakkersuisoq Mimi Karlsen ataatsimeeqatigaa.
Tasiilami inuit sakkortuumik ajornartorsiuteqarnerat pillugu imalimmik DR TV-kkut piviusulersaarummik : ”Byen hvor børn forsvinder” -mik qulequtalimmik 2019-mi saqqummiussereernerata kingorna Danmarkip naalagaaffia 80 mio koruuninik aningaasaliivoq, taakkulu suliassanut assigiinngitsunut 16-nut atorneqassasut siunertarineqarpoq.
TV-kkut piviusulersaarutip imaraa sumiginnaanerujussuaq kinguaassiutitigut atornerluineq, meeqqanut inuusuttunullu nakuusernerit, oqartussaasullu tamakkununnga iliuuseqannginnerat.
- Qularutigisinnaanngilarput matumani pineqartoq tassaammat Kalaallit Nunaanni meeqqat ilaasa inuunerminni piviusumik atugaat tassaammat innarlerneqarlutillu kanngunarsagaallutillu peroriartortuummata taakkulu toqqissimanarnerusumik atugaqarlutik peroriartornissaat anguniarparput. Meeqqallu soorunami taamatut atugaqartinneqartussaanngillat, taamaattumik meeqqat matumani pingaanerutippagut, Astrid Krag oqarpoq.
Nunatsinnimi meeqqat pingasuugaangata ataaseq meeraanermini sumiginnarneqarsimasarpoq, meeqqallu 1995-mi tamatumaluunniit kingorna inunngortut tallimaagaangata ataaseq kinguaassiutitigut atornerlunneqarsimasarpoq.
- Ajoraluartumimmi kisitsisitigut takusinnaasarparput ajornartorsiutip piunera annertoorujussuusoq, taamaammalluuna Kalaallit Nunaanni naalakkersuisut tamanna iliuuseqarfigerusukkaat, uagullu danskit tungaanniit tapersersuerusoqaagut, tassa meeqqat tamarmik toqqisssiimasumik avatangiiseqarlutik peroriartortariaqarput, Astrid Krag oqarpoq nangipporlu:
- Tamannalu aaqqinneqassappat soorunami inuiaqatigiinni aaqqissuussaaneq aamma aaqqittariaqarpoq. Suliamut ilisimasaqassuseqarneq aqqutigalugu meeqqat ikiorneqartariaqarput, meeqqanut nalorninaallisinneqartariaqarpoq taamatut atugaqarnerminni kisimiinngimmata aammalu ikiorneqarsinnaammata.
AAMMA ATUARUK Danskit isumaginninnermut ministeriat: Kalaallit Danmarkimiittut ikioqatigiittariaqarput
Danmarkili nunarpullu assigiinngilluinnartuupput, aamma ikiorsiiniarnerup tungaatigut.
pingaaruteqarpoq paasissallugu Kalaallit Nunaata nunatamigut immiikkullarissuseqartuunera, nunap ilutsimigut pissusaata inuit ilaqutariissuselu avinngarusimatippai, Danmarkimisulli ajornanngitsigisumik aaqqiisoqarsinnaanngilaq oqaannarsinnaalluni maani aamma taamatut aaqqiiginnassaagut.
- Taamaammat Kalaallit Nunaanni naalakkersuisut nunaminni pissutsinik ilisimaarinninnerummata ammatipparput nunaminni atukkat pillugit aaqqiissuteqarsinnaatinnissaannut, tamannalu pitsaasuuvoq, qangalilu periutsitut kissaatigisaammat pimoorullugu aallartinneqartoq malugisinnaavara, ministeri oqarpoq.
Suliassatut innersuussutit 16-t oqaluttuassartaa:
- 2019-mi ukiakkut DR Tasiilami pissutsit pillugit piviusulersaarummik ”Byen hvor børn forsvinder” aallakaatitsivoq. Imaraalu sumiginnaanerujussuaq, kinguaassiutitigut meeqqanut atornerluinerit, oqartussallu iliuuseqannginneri.
- Naalakkersuisut Inatsisartunit amerlanerussuteqartunit kimigiiserfigineqarput nunatsinni meeqqat inuusuttullu atugaat pillugit danskit naalakkersuisuinut ikiortiserinnissasut.
- Danmark 2023-p tungaanut ajornartorsiummut atorneqartussanik 100 mio. koruuninik immikkoortitsivoq
- Kalaallit danskillu ilinniakkamikkut ilisimasallit siunnersuuteqarput. Siunnersuutigineqartullu 16-isut nunatsinni meeqqanik inuusuttunillu iluaqusiinissamut siunertallit 2023-p tungaanut suliarineqassapput.
Ilorraap tungaanut
Qulequttallu pineqartussat oqimaappasikkaluartut taanna isumaqarpoq ilorraap tungaanut ingerlasoqartoq:
- Suleqatigisamma nunatsinniiillu suleqatitta oqaasii aammalu nalunaarusiat atuakkakka naapertorlugit suliniutiginiakkagut tamarmik aallartilluarput, tamannalu soorunami nuannersuuvoq, taanna oqarpoq.
- Tamanilli nuannernerpaassagaluarpoq, meeqqanik atornerluinerit kanngunarsaanerillu piujunnaartuuppata, taamaammalluuna atornerluisartunut ikiorseerusuttugut aamma taamaalillutik atornerluisarunnaarniassammata. Aammattaaq meeqqat meeraqatiminnik atornerluisartut alaatsinaappagut unitsinniarsaralugillu.
Kinguaassiutitigut atornerluinerit kanngunarsaanerillu oqaluuserissallugit paqumigineqarluinnartarput ikiorneqarumallunili misigigaanni, ikiortissarsiorneq allaqqunneqarsinnaanngilaq
- Tamanna allanngortinneqassappat saqqummersittariaqarpoq ammasumillu oqallisigisariaqarluni eqqartuisoqarpammi aatsaat ikiorneqarnissamut aatsaat alloriartoqarsinnaavoq. Sapiillilluni oqartoqarsinnaasariaqarpoq ajornartorsiorluni oqarluni ikiorneqarnissamullu pisariaqartitsinerarluni, Astrid Krag oqarpoq.
Kisimiittutut misigisimaguit oqaloqateqarusukkuillu Tusaannga uunga normumut sianerfigineqarsinnaavoq 80 11 80 imaluunniit sms-ikkut allalluni uunga 18 99. Tusaannga unnuakkut sisamat tungaannut ammasarpoq.
Ammasarfiilu imaapput:
Sapaat - sisamanngorneq 9:00 - 00:00
Tallimanngorneq - arfininngorneq 09:00 - 04:00
