Danskit isumaginninnermut ministeriat tikeraartoq: Nunatsinnut tapiissutaareersut 80 millionit koruuninik ilaneqarnissaat kissaatigigaa
Danmarkimi naalakkersuisut 5,3 millioner koruuninik nunatsinnut qaammatip kingulliup naanerani tapiissuteqarput. Aningaasat taakku Tasiilami meeqqanut kinguaassiutitigut atornerlunneqarsimasunut ikiuigasuartartussanut atorneqassapput.
Kalaallit Nunaannut tapiissutigeriikkavut 80 millioner koruuninik ilasinnaajumaarivut neriuutigaarput, danskit isumaginninnermut nunamilu namminermi pissutsit pillugit ministeriat Astrid Krag Socialdemokratineersoq KNR-imut taama oqarpoq.
Astrid Krag naalakkersuisoq Martha Abelsen (S) tikeraarlugu Nuummiileruttorpoq.
AAMMA ATUARUK Danmarki 5,3 millioner koruuninik Tasiilamut tapiissuteqartoq
- Kalaallit Nunaanni kinguaassiutitigut pinerlunnerit unnerluutigineqarsimasut Danmarkimi Savalimmiunilu pinerlunnernut unnerluutigineqarsimasunut sanilliullugit arfineq-pingsoriaammik amerlanerupput.
- Tasiilap inuttussusaa eqqarsaatigalugu meeqqanut inuusuttunullu kinguaassiutitigut pinerluttuliornernut tunngatillugu Kalaallit Nunaanni unnerluussinerpaaffiusarpoq.
- 2018-imi pinerlunnerit unnerluutigineqarsimasut 27 proccentii Tasiilami meeqqamik 15-iliineqanngitsumik kinguaassiutitigut atoqateqarnermut tunngapput, massa Kalaallit Nunaata inuisa kinguaassiutitigut atornerlunneqarsimasut 5 procentii Tasiilameersuusut.
- Tapiissutaat 5,3 millioner koruuniusut ikiuigasuartartussanut atorneqassapput – aningaasalli taakku naammaqqajanngillat. Taamaattumik siunissaq ungasinnerusoq eqqarsaatigalugu suleqatigiilluta aallartippugut, neriuppugullu 80 millionit koruuninik tapiissuteqaqqinnissatsinnut Folketingimit taperserneqarumaartugut, Astrid Krag oqarpoq.
Aningaasat taakku 5,3 millioner koruuniusut ikiuigasuartartussanut isumaginninnermi siunnersortinik, tarnip pissusiinik ilisimasalinnik misissuisartunillu taamatuttaaq ilaqutariinnut sullissisartunut inuttalerneqassangatinneqartunut atorneqassapput, taakkulu Tasiilami Tasiilallu eqqaani isumaginninnermi suliassarpassuit ikilisarnissaannut taakkuninnga misissueqqissaarineq pingaarnertut qaammatini pingasuni suliassarissavaat.
Aaqqiissuteqarnissatsinnulli aatsaat aallarteruttorpugut, Astrid Krag erseqqissaavoq. Siunissarmi ungasinnerusoq eqqarsaatigalugu aaqqiissuteqarnermi ikiuigasuarneq kisiat pineqartanngilaq.
- Sulinitsinni pingaarnertut tunngavigisavut pingasuupput, siullertullu meeqqat kinguaassiutitigut atornerlunneqarsimasut isumagineqarluarnissaat qulakkiigassaraarput. Atornerluisimasullu aamma ikiorneqassapput. Atornerluisimasummi iliuuserisimasaat atornerlunneqarsimasunut ingerlaqqeratarsinnaasartut ilisimavarput, Astrid Krag oqarpoq.
AAMMA ATUARUK Tasiilami kommunip pisortaa: Ullumikkut neriulluarnartoqarpoq
- Pingaarnerut tunngavigisatta pingajuanni pitsaaliunerusoqarnissaa pineqarpoq, qanormiuna ilillluta tunngaviusumik ajornartorsiutit atuuttut anigorniarivut?, ministeri oqarpoq.
Suleqatigiiissitaq Danmarkip isumaginninnermut ministereqarfianeersunik nunatsinneersunillu sinniisuutitalik 2020-p qiteqqunnerani innersuussuteqartussaavoq.
Danmarkip naalakkersuisui nunatsinni naalakkersuisut ilaatigut Tasiilami meeqqat ikiorneqarnissaannut tunngatillugu Danmarkimit aasalersoq ikioqqoreernerisa kingorna tapiissuteqarput. Danmarkip naalakkersuisui nunatsinni naalakkersuisut ilaatigut Tasiilami meeqqat ikiorneqarnissaannut tunngatillugu Danmarkimit aasalersoq ikioqqoreernerisa kingorna tapiissuteqarput. DR-ip Tasiilami meeqqat inuusuttullu atugaat avaanngunartut pillugit piviusulersaarusiaa "Byen hvor børn forsvinder" aallakaatinneqareersorlu taama pisoqarpoq.
