Asii: Naalakkersuisut nussuinissaq akisussaaffigaat

Qaasuitsup Kommunianit, Qeqqata Kommunianit Kommune Kujallermiillu atorfilittat, KANUKOKA, Naalakkersuisut siulittaasuata naalakkersuisoqarfia aningaasaqarnermullu naalakkersuisoqarfik suleqatigiissitami ilaasut, Namminersorlutik Oqartussat tusagassiuutinut nalunaarutaanni takuneqarsinnaavoq.

Aamma atuaruk NUUMMIT NUUNNEQ Suleqatigiissitami nussuinissaq sammineqassaaq

Kommuneqarfik Sermersuullu peqataannginnera kommunimit piumasarineqarsimasoq, borgmesteri Asii Chemnitz Narup oqarpoq.

- Isumaqarluinnarpunga Namminersorlutik Oqartussat suliffeqarfiutaasa sumiinnissaannik aalajangiinissaq Naalakkersuisut akisussaaffigigaat, Asii Chemnitz Narup taama oqarpoq.

Kommunip suliffinnik annaasaqarnissaa ernummatigineraa aperiniqarami, Asii Chemnitz Narup ima oqarpoq.

- Isumaqarpunga akisussaaffinnik aammalu inuiaqatigiit aaqqissuussaanitsinni pissaanerup pingasoqiusanngorlugu agguataarneqarsimanerata iluasaa aamma ataqqilluinnartariaqartoq. Akisussaaffinnik ersernerluttorujussuarmik inissiisoqalissappat pitsaasuusorinngilara.

Aamma atuaruk NUUMMIIT NUUNNEQ Kielsen: Suliassaqarfinnik komuninut nussuinissamut suliaq aallartinneqareerpoq

Borgmesterit allat suliffinnik sinerissamut siaruaassinissamik kissaateqarnerat Asii Chemnitz Narupip paasisinnaavaa. Suliffinnillu nussuinissaq kommunerujussuanngortitsinermi siunertaagaluartoq eqqaasitsissutigalugu.

- Kommuninik aaqqissuusseqqinnermi siunertaq uterfiginiartigu. Akisussaaffinnillu amerlasuunik nussuilluta. Taamaasiornermikkut suliffissat aamma malinnaasussaammata.