Eqqartuussivinni oqaatsitigut unammillernartut Arnannguaq paatsoorneqartoq
- Nammineq taamani sanngiittorujussuullunga inisseqqavunga. Namminerlu oqaatsikka atorumallugit, arnaq tunumiutut pingaarnertut oqaluttoq kinaassutsiminik isertuussisoq taama oqarpoq.
Taassuma aqqa KNR-imi ilisimavarput, ullumikkullu Arnannguamik taagorlutigu.
Namminerli oqaatsini atussallugit aalajangernini peqqissumissutigaa. Oqaasiisa ilaat nutsernerlunneqarput, paatsoornerillu tunngavigalugit apersorneqarluni.
- Uannut ulloq tassani eqqartuussivimmiilluni nukersornartigereersoq uangaalluni toqqissisimanngilaq, "Arnannguaq" oqarpoq.
AAMMA ATUARUK Eqqartuussivinni illuatungeriit paatsoortoqannginnissaanut ikioqatigiittartut
Nunatsinni eqqartuussivinni sumiorpaluutit arlallit oqaatsillu assigiinngitsut atorneqartarput. Tassalu inuit ilaat paasisinnaanngisaminnit oqaluunneqartarsinnaasarput. Oqalutsinillu sumiorpaluutinik allanik paasilluarsinnaasunik pissarsinngitsoortoqartarmat, eqqartuussivinni oqalutseqarneq nukittorsarneqartariaqartoq inuit pisinnaatitaaffii pillugit institutip Ilisimatusarfiullu misissuinerminni inerniliuppaat.
Ilisimatusarfiup Inuit Pisinnaatitaaffiinut Institutip ilaatigut ima inassuteqarput:
• Nutserisussanik piaartumik inniminniisarnerup annertunerpaamik ingerlanneqarnissaa Kalaallit Nunaanni Eqqartuussiviup qulakkiissagaa.
• Oqaasiliortut taaguutinik allattuivik atuuttoq nutartissagaat inatsisilerinermilu taaguutit nutaat siunissami ingerlaavartumik akuerisassagaat.
• Suliami sapinngisamik marlunnik oqalutseqartarnissaa eqqartuussiviit isumagissagaat, pingaartumik suliani sivisuumik ingerlanneqartuni.
• Eqqartuussivinni atorneqarsinnaasunik tunumiut oqaasiinik avannaamiullu oqaasiinik atuisinnaasunik paasinnissinnaasunillu aalajangersimasunik atorfilinnik oqalutseqarnissaa imaluunniit aalajangersimasunik immittakkanik nutserisoqarnissaa Kalaallit Nunaanni Eqqartuussiviup qulakkiissagaa, immaqa nutserisut aalajangersimasumik atorfillit tunumiut avannaamiullu oqaasiinik ilinniarteqqinnerisigut.
Najoqqutarisaq: KALAALLIT NUNAANNI EQQARTUUSSIVINNI NUTSERISARNEQ – Ilsisimatusarfiup Inuit Pisinnaatitaaffiinut Institutillu nalunaarusiaat
Eqqartuusseqataasut ilaasa nutserisoq naqqittaraat "Arnannguaq" oqaluttuarpoq. Sulili paatsoortoqartarsimasoq, taanna oqarpoq.
- Dommeriusullu ilaasa eqqartuussinerup ingerlanerani maluginngitsoorlugu uanga nammineerlunga kitaamiusut nutseqqittariaqartarlugit.
AAMMA ATUARUK Eqqartuussivinni oqalutseqarneq pitsaanerusariaqarpoq
"Arnannguullu" misigisani allanit misigitikkusunngilai.
- Kusaginngilara siunissami taamatut ingerlaannassappata, immaqa siunnersuutigilaarsinnaavaraluunniit allat taamatut misigiteqqunagit nutserisumik aalajangersimasumik pissarsiniarsarisariaqartut, "Arnannguaq" oqarpoq.
Eqqartuussivinni tunumiusut oqalussinnaasunik nutserisussaaruttarnerup unammillernarnerpaasarnera nalunaarusiami "Kalaallit Nunaanni Eqqartuussivinni Nutserisarnermik" taaguutilimmi allaaserineqarpoq.
Arnannguamik taasarput kinaassutsiminik isertuussivoq, aqqali aaqqissuisoqarfimmit ilisimavarput.
