Eqqartuussivinni illuatungeriit paatsoortoqannginnissaanut ikioqatigiittartut

Nutsernerlukkat tunngavigalugit eqqartuussisoqannginnissaa pingaaruteqarpoq. Taamaammat eqqartuussivinni oqaluuserineqartut tamanit paasineqarnissaannut illuatungeriit sapinngissaminnik ikioqatigiinniartartut illersuisoq unnerluussisorlu oqarput.

Nunatsinni eqqartuussivinni sumiorpaluutit arlallit oqaatsillu assigiinngitsut atorneqartarput. Tassalu inuit ilaat paasisinnaanngisaminnit oqaluunneqartarsinnaasarput. Oqalutsinillu sumiorpaluutinik allanik paasilluarsinnaasunik pissarsinngitsoortoqartarmat, eqqartuussivinni oqalutseqarneq nukittorsarneqartariaqartoq inuit pisinnaatitaaffii pillugit institutip Ilisimatusarfiullu misissuinerminni inerniliuppaat.

Oqaatsitigullu unammillernartoqartarnera illersuisumit akuerisamit unnerluussisuunermiillu ilisarineqarpoq.

Eqqartuussivinnilu nutserisussaqanngikkaangamik illuatungeriit ikioqatigiittartut, illersuisoq oqaluttuarpoq.

- Unnerluussisoq tunumiutut oqalussinnaaguni ilaannikkut ikiuussinnaasarpoq. Aamma eqqartuusseqataasut ikiuussinnaasarput. Ikioqatigiinnitsigut taanna aaqqissinnaasarparput, illersuisoq akuerisaq Jørgen Steenholdt oqarpoq. 

AAMMA ATUARUK Eqqartuussivinni oqalutseqarneq pitsaanerusariaqarpoq

Imminnullu paasisinnaasoqanngikkaangat piffissaajaataasartoq taanna oqarpoq.

- Piffissaq sivisuneq ingerlasinnaalertarpoq. Uneqattaarnerit, taavalu paatsuugaqarsimagaanni unitsillugu. "Qanoruna oqartoq, taanna paasilaarusuppara". Ikioqatigiilluta arlaat aperilaarlugu taava ingerlaqqilluta, Jørgen Steenholdt oqarpoq.

Ingammik Tunumiutut oqaluttoqartillugu taamaattoqarnerusartoq taanna oqaluttuarpoq.

Eqqartuussivinnilu arlaat paasiuminaatsinneqarpat eqqartuussivinniittut ikioqatigiittariaqartartut aamma politiini unnerluussisuuneq oqarpoq. 

Paatsooqqajaanerilli unammillernartartoq taanna oqaluttuarpoq.

- Videukkut killisiuisoqareertoq killisiorneqartup oqaasiisa allattorsimaneri danskisullu nutserneqarneri isumaqatigiinngissutaanikuupput, politiini unnerluussisuuneq, Morten Nielsen oqarpoq, nangillunilu.

- Tamannali taamaattoqartillugu naammattoorsisoqartarneranik isumaginnittoqartarneranillu assersuutaavoq, Morten Nielsen oqarpoq.

AAMMA ATUARUK Eqqartuussivinni oqalutseqarneq pitsaanerusariaqarpoq

Nutserisulli oqaatigineqartut tamaasa paasisinnaanissaat kissaatigaa.

- Tamanna soorunami nalunanngilaq. Tamanna suliat suliarineqarnissaannut pitsaanerpaajuvoq, Morten Nielsen oqarpoq.

Sumiorpaluutillu assigiinngitsut oqaatsillu assigiinngitsut atorlugit sulinermi unammillernartut oqaluuserineqalernerat Jørgen Steenholdtip nuannaarutigaa.

Nutserisullu oqilisaanneqarnissaat taassuma kissaatigaa.

- Suliaq annertoorujuk tigummivaat. Immaqa taakkua amerlisiallassinnaagutsigit immaqa iluaqutaarujussaaq, Jørgen Steenholdt oqarpoq.

Unnerluussisuunerullu paatsooqqajaanerit annerusumik kingunerlutsitsisimasorinngilai.

- Nalunaarusiami takuneqarsinnaasutut, pinngitsuusunik paatsoornerit kingunerannik arlaatigut pisuutitaasoqarsimasorinngilluinnarpara, politiini unnerluussisuuneq, Morten Nielsen, oqarpoq.

Qanorooq 27.03.2019

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl