Arnanik persuttaasarneq akiorniarlugu paasisitsiniaasoqalerpoq

Amnesty Internationalip arnanik persuttaasaneq akiorniarlugu paasisitsiniaanini aqagu aallartissavaa. Ullunilu 16-ini paasisitsiniaaffiusuni nunat aalajangersimasut arnap pisinnaatitaaffiinik illersuinerminik suliniuteqarpianngitsut immikkut ittumik samminiarlugit Amnesty International nalunaaruteqarpoq. Danmarkilu nunanut 16-iusunut ilaavoq.

Nunat 15-it peqatigalugit Danmark immikkut sammineqartussanngorpoq. Amnesty Internationalip immikkoortortaqarfiani sulisoq Camilla Laudrup tamanna pillugu ima oqarpoq:

- Arnat nunasisut pisinnaatitaaffiinik isumaginnittarnerput Naalagaaffiit Peqatigiit arnallu pisinnaatitaaffiisa atortinneqarnissaanik suliniutillit isornartorsioreermassuk, immikkut taama sammineqarnialerput. Arnat nunasisut annersartittarnertik Danmarkimiilluunniit anisinneqarnissartik qinertariaqartarpaat, Camilla Laudrup oqarpoq.

Danmarkimi inatsisit naapertorlugit arnat nunasisut ukiut arfineq-marluk ingerlanerini uitik annersaasartut avissimagunikkik Danmarkimit anisitaasarput. 150-t siorna anisitaapput. Amerlanngitsut immikkut akuerineqarlutik Danmarkimiipput. Arnat uiminnit annersartittarnertik uppernarsaatissaqartinneq ajoramikku, immikkut akuerineqarnissartik ajornakusoortittarpaat. Tamannalu Amnesty Internationalip isornartorsiorpaa, Danmarkimilu nunasisunut ministeri iliuuseqaqqullugu kajumissaarneqarpoq.

Nunasisunut ministeri Rikke Hvilshøj tamatumunnga ima oqarpoq:

- Arnat avinniarnerminni persuttarneqartarnertik uppernarsaatitut atorsinnaasariaqarpaat, Danmarkimilu najugaqaannarsinnaasariaqarlutik. Arnat sapaatit akunnerini tulliuttuni paasisitsiffigisariaqarpavut, Rikke Hvilshøj oqarpoq, nangillunilu:

- Danmarkip nunanit allanit isigineqarnera eqqorneqartussaammat nuannarivallaanngilara, Danmarkimi nunasisunut ministeri Rikke Hvilshøj naggasiivoq.