Arnami inigisaa ikuallatsikkaa: Arnilu allani maanna nalaasaarfimmiutaasartut
Charlotte Kanuthsenip ernerata arnami inigisaa siorna apriilimi ikuallatsimmaguli Charlotte Kanuthsen Nuup ilaani Nuussuarmi inigisaminiit anisitaavoq.
Inissiaatileqatigiiffik Iseritsip Charlotte Kanuthsenimik anisitsinerminut `imminut navianartorsiortinnera allanillu navianartorsiortitsinera´ tunngavilersuutigaa.
Iseritsillu Charlotte Kanuthsen inigisaaniit inissianik attartortitsinermut inatsimmi immikkoortoq 75-imi allaqqasut naapertorlugit anisilertorsinnaagaluaraa taamaaliornera kukkunerusoq, Charlotte Kanuthsenip illersuisua Julie Heick oqarpoq.
- Taamaaliornissamut inatsimmi qanoq allaqqasoqarnersoq allaavoq, qanorli iliortariaqarneq aamma allaavoq.
- Tassa pisut qiviaraanni anisitsisinnaatitaagaluaruniluunniit taamaalioqqissaartariaqanngilaq, taanna oqarpoq.
Politiillu inissianiit anisitsisuusarmata inissiaatileqatigiiffik Iserit nammineerluni isumagisimasussaanngikkaluaraa, taanna aamma erseqqissavoq. Kommuneqarfik Sermersooq isumaqataavoq ilisimatitsissutigalugulu ´politiit anisinniarneqalersaartunik sumunnarfissaqarnissaannik qularnaaritinnatik anisitsisanngitsut’.
- Suliamili uani (Iseritsip, (aaqq.)) Charlotte inigsaanut isitsaalillugulu tassannga anisilertorpaa, Julie Heick oqarpoq.
Tassa Charlotte Kanuthsen taamaalilluni angerlarsimaffeeruppoq. Taanna erninilu 30-t sinnerlugit ukiuliusoq ilaquttaminni ilisarisimasaminnilu maanna nalaasaarfimmiutaasarput.
Ikuallatitsereernerani angerlarsimaffeeruttut
Tassa suliaq una Charlotte Kanuthsenip inigisaata iluarsaalluinnartariaqarneranik kinguneqartumik ernerata angerlarsimaffimminni siullermik sinittarfimmini kingornalu inigisaasa ilaani siorna apriilip 27-ani ikuallatsitsinerata kingornali aallartippoq.
Charlotte Kanuthsen ernini ´piaaraluni ikuallatsitsisimasutut´ pasineqarluni politiinit taamani tigusaanerata kingorna Nuummi allaniittarpoq, siullermik utaqqiisaasumik inissiameeqqaariarluni Manguaqqami inigisaminut ikuallatsitaareerluni iluarsaanneqareernerani 2024-mi januaarip 28-ani uteqqinnissaminut ilisarisimasaminiittarlunilu ilaquttaminiittarpoq.
Charlotte Kanuthsen inigisami ikuallatsitaaneranut akisussaanngikkaluarluni inigisami iluarsaanneqarneranut aningaasartuutinut tamanut akiliisussanngortinneqarpoq. Tassa 600.000-900.000 koruunit missaannioqqooqaaq taarsiissuteqarnissamut atsioqquneqarnermigut akiliisussanngortinneqartoq, Charlotte Kanuthsen illersuisualu Julie Heick oqarput. Piumanngikkaluarluni atsioqquneqarsimalluni, Charlotte Kanuthsen oqarpoq.
- Iseritsip allakkiamik taarsiissuteqaqqusisinnaanerminik imaqartumik pinngitsaaliilluni atsioqquaanga, taanna oqarpoq.
Taamaaliornissamillu isumaqatigiissuteqarnikuunngikkaluarlutik kontominiit Iseritsip qaammatit arfineq-marluk ingerlaneranni aamma akiliisittarsimagaani, Charlotte Kanuthsen oqarpoq.
Koruunit tuusintilikkuutaat
Iseritsip Charlotte Kanuthsen katillugit 157.000 koruuningajalluinnarnik kontoaniit 2023-mi juulip 2024-llu aallartinnerata akornanni akiliisissimagaa, Charlotte Kanuthsenip kontoanit paasissutissani erserpoq, taakkualu takuagut.
Aningaasat taakkua 157.000 koruuningajalluinnaasut amerlanerpaartaat Iseritsip akiliisitsisaarnerminiit ullualuit qaangiukkaangata Charlotte Kanuthsenip kontoanut utertittarsimavai, suliarlu taanna Charlottep ernerata eqqartuussaareernissaanut 2024-mi januaarip naanerani unitsikkallarlugu.
Charlotte Kanuthsenili 45.000 koruuninik suli utertitsivigineqartussaanersoq, tasssunga illersuisuanullu suli paaasinarsivinngilaq.
Inimik attartorunnaarsitsineq ilumut tunngavissaqartoq, Iserit uppernarsaasussaatitaavoq. Charlottelu inigisami ikuallanneranut akisussaanersoq Iseritsip uppernarsinikuunngilaa. Taamaammat suliami tassani ernerata ikuallatsitsisimasutut eqqartuussaareernerani allatut aalajangeeqqissinnaasutut imminut pisinnaatilluni Charlottemut inimik attartorunnaarsitsiniarnini unitsikkallaraa, Julie Heick oqarpoq.
Iseritsili suliamik taassuminnga unitsitsigallareeraluarluni Charlotte Manguaqqamiit januaarip 28-ani iserterfigeqqinnikuusaaniit aniseriaraluaqattarpaa.
Tunngavilersuutaalu ataasiujuarpoq.
- Iseritsip Charlotte imminut navianartorsiortittutut taavalu allanik inissiamillu navianartorsiortitsisutut nalilernikuuaa. Inigisaatali ikuallanneranut ilumut akisussaanersoq uppernarsaateqanngiivippoq, suliamillu tamatuminnga taamanikkut suli misissuisoqarluni, Julie Heick oqarpoq.
Iseritsili uppernarsaatissaqanngimmat, Charlotte Kanuthsen ernermi eqqartuussaareernissaanut inigisaminiiginnarallarsinnaatitaavoq.
Sorlu tassa filmimiiginnarluni
Charlotte Kanuthsenilu ernini piaaraluni ikuallatsitsisimasutut tallimanngornermi marsip arfineq-pingajuani ualikkut pingasut qaangilaaraat eqqartuussaatsiaannartoq, Nuussuarmi Manguaqqamiiginnarsinnaaneranik Iserit aalajangerpoq.
Tassalu Charlotte Kanuthsen inigisaminiit ataasinngornermi ullup qeqqartinnagu anereersimassalluni paasitinnneqarpoq.
- Inimiit eqqartuussiviusumiit anitsiaannartunga Iseritsimeersut allakkanik isaassivigaannga, ataasinngornermilu anereersimassasunga allakkani taakkunani allaqqavoq, Charlotte Kanuthsen oqarpoq.
Charlotte Kanuthsenip inigisaminik ikuallatsitsisuusumik najugaqateqarnera anisitaaneranut pissutaasoq taamaammallu inigisami ikuallaneranut nammineq pisuummat tassani ineqarunnaartariaqartoq, Iserit inimik attartorunnaarsitsinermut allakkiamini nassuiaavoq.
- Soorlu tassa filmimiiginnarluni, Charlotte Kanuthsen ernermi eqqartuussaanerata kingunitsiannguagut misigisani pillugu oqarpoq.
- Ernermami politiini ukioq ilivitsoq sinnilaarlugu tigummigallagaareerluni iperagaanera nuannaarutiginiaasaarlugu inigisanniit anisitaallunga paasitinneqarama nikalluallarujussuarpunga, taanna oqarpoq.
Nikalluallarujussuarnerali tassunga killinngilaq. Nuussuarmimi inigisaminut apuukkami matuata silarliup matuersaaserfia allamik taarserneqarsimammat aamma iseriaannaasimanngilaq.
- Matuersaaserfik allamik taarsersimagitsik taamaaliulertornerallu nalinginnaasuusoq Iseritsip inissialerisua oqarasuaatikkut oqaluukkanni ilisimatippaanga, Charlotte Kanuthsen oqarpoq.
Qanormi taava iliussaanga?
Charlotte Kanuthsen qaqugu tungaanuugaluarnersumut angerlarsimaffeqanngilaq, kommunimiillu ikiorserneqarnikkut qanittukkut initaarallarnaviarpasinngilaq.
Ernermi marsip arfineq-pingajuani eqqartuussaareerneranili marluullutik qaammatit tamaasa sumiiffissarsiortaareerlutik maannamut sisamariarlutik nuupput, inimik attartortarput aamma ilarisimasaminni ilaquttaminnilu nalaasaarfimmiutaasarput. Aalajangersimasumik initaaqqinnissi qaquguujumaarnersoq naluaa.
- Iseritsillu Charlottemut taamaaliornera sullissinerlunneruvoq, Julie Heick oqarpoq.
Iseritsimiit suliamut tassunga tunngasumik oqaaseqarusunngimmata, Charlotte Kanuthsenip siornali maannamut misigisaminik oqaluttuai kisiisa allaatigisami uani oqaluttuaraavut.
Kommunemiit suliamut tassunga tunngasumik aamma oqaaseqarumanngillat. Iseritsip tamatumunnga tunngasumik akissutaanut innersuutiinnarpaatigut.
