Attu kunngikkormiunit ukiuni 50-ini tikinneqarsimanani tikilluaqquseqqittoq
Kunngikkormiut nunatsinnut tikeraaleruttorput. Kunngikkullu kunngi Frederik aamma dronning Mary meeqqatik nukarliit marluk peqatigalugit nunatsinni angalapput.
KNR-ip ilanngutassiortua, Arnaq Nielsen kunngikkut angalaneranni malinnaavoq, taannalu kunngikkut tikeraarnerat pillugu ataasinngornermi siusissukkut killiffiat pillugu oqaluttuarpoq.
- Tikiffigut tamarmik inunnik kunngikkormiunik ilassinnikkiartortunik ulikkaartarput. Inuit nuannaarput, kunngip Frederiup aamma dronning Maryp tikeraarnerat nuannarineqarluartoq malugineqarsinnaavoq. Inuit oqaloqatigineranni tikeraarneqartik nuannaralugulu attortissutigalugu oqaluttuarisarpaat, Arnaq Nielsen oqarpoq.
Kunngikkormiut marluliaataat, prinsesse Josephine aamma prins Vincent arpannermi Qeqertarsuaq Racemi Ataqqinartorsuarmit Kunngimit aallartinneqartumi peqataapput.
Attup nalliuttorsiornera
Ataasinngorneq Attumut tikipput, kunngillu Frederiup nunaqarfiup 2018-imi ukiuni 200-nngortorsiorneranut atatillugu eqqaassutissiaq uleerseqataaffigaa.
Taannalu kisimi nalliuttorsiutigineqanngilaq.
- Kunngip dronningillu oqaluffik maanna alakkarpaat. Immikkuullarilaarporlu, oqaluffimmi ukiut 50-it matuma siorna dronning Margrethemit atoqqaartinneqarpoq, nuanqarfillu ukiut 50-it matuma siorna kingullermik aamma tikeraarneqarpoq. Inuit nuannaarlutillu killitsisimarrattut malugineqarsinnaavoq, Arnaq Nielsen nassuiaavoq.
Kunngikkormiut Attumut tikeraarnerup kingorna Sisimiunut ingerlaassapput, marlunngornermilu assigiinngitsunik arlalinnik pilersaaruteqarput.
