23-nik ukiulik eqqussisimasutut pinerlunnikkullu aningaasarsianik malunnarunnaarsaasimasutut eqqartuunneqartoq

Angut 23-nik ukiulik pinerlunnikkut aningaasarsianik 1,8 millionit koruuninik hashimik 4 kiilumik eqqussisimasutut ullumi eqqartuunneqarpoq.

Kalaallit Nunaanni Politiit ataasinngornermi ualikkut tusagassiuutinut nalunaarummi paasissutissiipput.

Pinerluuteqartoq politiit oqarnerat naapertorlugu pinerlunnikkut aningaasarsianik malunnaarsaaniarsimavoq, taamaammallu piffissami sivisuumi misissueqqissaartoqarsimalluni.

- Nunat tamalaat akornanni aningaasanik nuussisarfikkut arlaleriarluni nuussisoqartarsimavoq. Tunisat allagartaat ilumuunngitsoq ilaatigut atorneqarsimavoq, tamatumalu kingorna Danmarkimi nunanilu allani inunnut nuussinissaq siunertaralugu aningaasanngortitanik akiliisoqartarsimalluni, Politikommissæri Malik Sandgreen oqarpoq.

Politiit misissueqqissaarnermut atatillugu ‘hashimik 4 kiilumit oqinnerunngitsumik’ umiarsuarmi containerikkut eqqussisoqarsimanerani ilisimalersimallugu oqaatigaat.

Februaarimili tigummigallagassanngortinneqartoq

Angut Nuummi akiliutigineqartut annertuut pissutigalugit februaarip aallartinneranili tigusarineqarpoq. Akiliutigineqartut pissutigalugu politiit 23-nik ukiulik paasivaat, taannalu februaarip arfineq-pingajuanni tigusarineqarpoq, tamatumalu kingornali tigummigallarneqalerluni.

Angutip hashi 4 kiilu eqqunneqarsimasoq, angummut aamma eqqartuussutigineqartoq angutip tigusimallugit pinerluuteqartunullu kikkuunerisa ilisimaneqanngitsunut ingerlateqqissimallugit nassuerutigisimagai politiit allapput.

Eqqartuunneqartulli suliaq Nunatta Eqqartuussisuuneqarfianut ingerlateqqinneqartussanngortippaa.