77-inik ukiulik umiatsiaq atorlugu hashimik anngiortumik nunatsinnukaassiniarsimasutut pasineqartoq

Hashimik Danmarkimit nunatsinnukaassiniarnermi Rømømi umiarsualivimmit umiatsiaq angallatissatut toqqarneqarsimasoq, politiit isumaqarput.

Politiit hashi katillugu 19 kiilu sisamanngornermi nassaarigaat, Syd og Sønderjyllandip Politiivi tallimanngornermi tusagassiuutinut nalunaarummi allapput.

Umiatsiamik piginnittoq angutaavoq 77-inik ukiulik. Taassa ikiaroornartunik nunatsinnut anngiortumik eqqusseriarsimasutut pasineqarpoq, taassuma pasilliutigineqartunut qanoq isumaqarnera pillugu politiit paasissutissiinngillat.

Angut killisiuisoqarnerata kingorna iperagaasoq, politiit inspektørip tullersortaa, Karsten Hulmose tusagassiuutinut nalunaarummi oqarpoq.

- Sivikitsumik misissuingaatsiartoqarneratigut ippassaq nassaarineqartut naammagisimaarluarpagut, taanna oqarpoq.

Aamma “aningaasarpassuit” arsaarinnissutigineqarput, politiilli aningaasat qanoq amerlatiginersut paasissutissiissutiginngilaat.

Anngiortumik eqqusseriartut allat assigiinngitsut ikiaroornartunik nunatsinnut eqqussuiniarnerminni ikiaroornartut puusiaaqqanut poortorlugit iisaraluarpaat. Periuserlu taanna aarlerinangaatsiartoq paasineqarpoq. Tamannami inuit arlallit toqunerannik kinguneqartoq 2022-mi nalunaarusiarineqarpoq.

Angut 53-inik ukiulik Qaqortumeersoq hashit mikisunut poortorsimasut kingunerisaanik erlavimmigut aseruuttoorluni toquvoq.

Angut 30-t sinnerlugit ukioqartoq Københavnimit Kangerlussuarmut ingerlaarnermini toquvoq. Pingajuallu angut Aarhusip eqqaaneersoq hashimik aqajarormioqarluni aamma toquvoq.