Qimmeq narajortartoq Nanoq ikiaroornartunik eqquteriaraluakkanik nassaartartoq
Timmisartup nipaa ilisarnaqisoq aanngasissumiit tusaaneqarsinnaavoq. Aqqarngup qaangilaarpaa, timmisartorsuarlu Danmarkimeersoq ullormut tikittussaq Kangerlussarmut milivippoq.
Taamaammallu akitsuuserisoq qimmialu Nanoq piareersimapput.
Piffissaqarpallaanngillalli. Timmisartoqarfiup tikittarfiani isertup siulliup nuineraniit, Air Greenlandip timmisartuanit appalaartumit ilisarnarluartumit niusup kingulliup isernissaanut minutsit quliinnaat piffissaraat.
Qimmeq unavoq, sorlui isugutattut aalajangersimangajattumik eqisarput, qimmillu qinngani tutsingajallugu inuit tulleriaalluutik nikorfasut uteqattaarluni narajortorpai.
Suliani kisiat aalluppaa, ujakkaminik pisaqarniarsarivoq. Timmisartorsuarmi Danmarkimeersumit ilaasut ikiaroornartunik timiminniititaqarpata nassataminniititaqarpataluunniit, taassuma nassaarissavaa.
Ikiaroornartulerinermut inatsimmut tunngasut suliat 155-it ukioq kingulleq Kangerlussuarmeersuusut, politiit ukiumoortumik nalunaarusiaanni takuneqarsinnaavoq. Taakkunanngalu 45-it timiminni ikiaroornartumik toqqortaqarput.
Suliat nunat tamakkerlugu 2023-mi 580-iupput, ataasinnnarlu timimini ikiaroornartumik toqqortalik Kangerlussuup avataani paasineqarpoq.
Kangerlussuarmi politiit naapertorlugit, haship Danmarkimi akikinnerunera maanilu akisunerunera tamatumunnga peqqutaavoq. Hashi nunatsinni 30-riaammik akisunerusoq, mittarfimmi politiit naliliipput.
Kinaluunniit eqqusseriartarpoq
Poorski sapaatit akunneranik sioqqullugu marlunngornermi ullaap tungaani, issittukasiugaa inuit assigiinngitsut tikittut, mittarfeqarfimmut aqqutaa sivikkikkaluaqisoq qiiarpaseqaat.
Ilaasullu assigiinngittaqimmata eqqusseriartumik nassaarniarnernimmi sunaqqissaaq maluginiartarnerlugu akitsuuserisut oqaatigiuminaatsippaat. Ilaasummi tassaasinnaaput takornariat, sulinerminnut atatillugu angalasut, maani nunallit imaluunniit angalasut ingerlaqqittussat.
- Qamannga malussarissuseq aallaaviuvoq. Inuit annilaangarpasippat, pissusilersuutaat qimmimmilluunniit avaqqutaariniarnerat imaluunniit arlaatigut pasinartumik pissusilersornerat maluginiartarparput, akitsuuserisut ilaat ullormi tassani KNR-imit malinnaavigisarput taama oqaluttuarpoq.
Kinaluunniit eqqusseriarsinnaammat takujuminaaattartoq aamma arnat angutillu eqqusseriartartut amerlaqatigiingajammata eqqoriaruminaattartoq mittarfimmi politiit oqaluttuarput.
Eqqusseriartut ukiui aamma assigiingittaqaat, taamaammat ataatsimut isigalugu kikkut eqqusseriartarnersut, akitsuuserisut politiillu ersarinnerusumik oqaatigisinnaanngilaat.
Taamaammallu aamma sunaqqissaaq maluginiartarnerlugu akitsuuserisut oqaatigisinnaanngilaat.
Igalaap akimut ersinngitsup tunuani
Pisoqaraangalli tamatigut pasinartoqarneq ajorpoq.
Angut nerinnattoq illuartinneqarpoq. Taanna sumut tamaannga qissimigariarluni sikippoq, akitsuuserisullu malillugit inimut teqeqqumiittumut matukkut illuartittagaasukkut iserpoq.
Matup foliemik ersigunnaarsakkap, inuit akitsuuserisup qimmianik saneqqussisinnaalernissaminnut nikuillutik utaqqisut tarraasa tunuani, susoqarnersoq pisup pinerani, qanoq pisoqarnera pillugu annerusumik paasisaqanngilagut.
Angulli siornatigut ikiaroornartumik eqqusseriartoq unitsinneqarsimasoq ilisarineqarluni illuartinneqartoq, ullup ingerlanerani akitsuuserisunit oqaluttuarineqarpoq. Eqqusseriallu timiminni toqqortallit nassaarfiginiarneranni atorluarneqartartukkut bodyscannerikkut, angut taqqamani ilaatigut misissorneqarsimasoq oqaluttuarineqarpoq.
Inuup timaa bodyscannerikkut tarrarsorlugu assilineqartarpoq, taamalillunilu timimini toqqorsilluni eqqusseriarnersoq paasineqartarluni.
- Paasiniarutsiguli ujagarput ilisimasaqarfigisariaqarparput, akitsuuserisut oqaluttuarput.
Ujaarlernermilu suna pineqartarnersoq aamma annerusumik oqaatigisinnaanngilaat.
Angut timiminiititaqanngitsoq ingerlaqqinnissaminut akuerisaavoq, cigaritsiutinilu akileraaruserneqanngitsut unermillugit anivoq.
Siparnit marluk aaqqatillu gummiusut
Bodyscannerimulli isertinneqartut tamarmik ingerlaqqinneq ajorput.
Ikiaroornartullu vaselinemik oliemilluunniit nerisassiornermi atorneqartartumik iiuminarsarlugit tanitat, husholdningsfilmimik eqeqqup nuuatut atsigilersillugit ulamertunngorlugit poortukkat takuneqaraangata, iisisimasut isertitsivimmut qilaani filmiliutilimmut siparnimik imermik kissartumik imalimmik, siparnimillu allamik imaqanngitsumik aaqqitinillu nassartillugit isertinneqartarput.
Taqqamani ikiaroornartoq timimit anisinneqartarpoq, politiit oqaluttuarput.
Ikiaroornartut tiguneqaarnissaat taqqamani qulakkeerneqartarpoq, kisiani aamma timimini toqqortallip inuunera annaanneqartarluni. Inuup peqqissusaa pingaarnerujuaannartoq politiit naqissusiipput.
- Timimiittussaanngitsunik iisisimagaanni inalukkat qissallannissaat ilimanaateqarsinnaavoq, politiit oqaluttuarput.
Taamaammallu tuaviornerpaamik Nuummukartinneqartarput.
Timillu pisarnermisut perusuersarnissamik pisariaqartitsinerata pinissaa politiinit utaqqineqalersarpoq, taamaaliornermilu kaffi, imeq nerisassalluunniit iluaqutsiunneqarsinnaasarput. Pisullu tamarmik ineeqqami tallimanik teqeqqulimmi qilaami filmiliutikkut alaatsinaanneqaqqissaartarput.
- Siparnimullu ingillutik timiminiititatik aniatissavaat, politiit oqaluttuarput.
- Ilaat allanit amerlanernik iisaqarsimasarput, grammialunniit 500 gram angullugu iisaqarsimasinnaasarput, politiit oqaluttuarput.
Sivitsunngitsorlu eqqartorneqartoq pillugu KNR-imiit nammineerluta takusaqarpugut. Angut puussiaaqqamik akimut ersittumik, ulamertunik allap timaaniissimasunik imalimmik nassarluni politeeqarfimmut tunniussiartorluni iserpoq.
Angut ikiaroornartunik timiminiititaqartoq ullualuit matuma siorna tigusarineqarpoq, poortugaaqqallu vaselinemik iiuminarsakkat piffissap ingerlanerani tulleriaallutik anillattarmata amerlanertigut ullut pingasut-sisamat ingerlaneranni tamakkerlutik anisartut politiit oqaluttuarput.
Nassaarniarneq naassaanngitsoq
Timiminiititaqarlutik eqqusseriartut nunat tamakkerlugu 2023-mi 46-galuartut, ikiaroornartorlu pillugu suliat 580-iugaluartut, haship arsaarinnissutaasup annikilleriangaatsiarnera politiit ukiumoortumik naatsorsuutaani takuneqarsinnaavoq.
2022-mi hashi 130 kilo arsaarinnissutaavoq, 2023-mut sanilliukkaanni ukioq taanna 96 kilo arsaarinnissutaavoq.
Anngiortumillu eqqussuineq politiinik akitsuuserisunillu eqqumaffigineqarpoq. Ikiaroornartut pineqarput kisianni aamma aningaasat pineqarput, taakkumi imminnut ataqatigiinnerat politiinit ilimagineqarpoq.
- Timmisartut tikinneranni ikiaroornartoq eqqumaffigisarparput, kisianni aamma aningaasat Kalaallit Nunanniit annissorneqartut eqqumaffigisarpagut, politiit oqaluttuarput.
Aningaasallu ikiaaroornartumik tuniniaanikkut isertinneqartut, ikiaroornartunik nutaanik eqqussuinermut atorneqannginnissaat taamatut pinngitsoortinniarneqartarpoq.
Periutsit taakkuujuartut politiinit akitsuuserisunillu oqaluttuarineqarput. Aningaasat timimi toqqorneqakkajuttarput, imaluunniit nassatani tigummiani, soorlu ikiaroornartut taamatoqqissaaq eqqunniarneqartartut.
Taamaammallu Kangerlussuarmi mittarfimmut tikinnermi Danmarkimulluunniit aallariartornermi, qimmeq ikiaroornartulerisoq Nanoq suleqataalu siullertut kingullertullu naapitassaasarput.
Oqaluttuarlu qitsuup terissamik pisaqarniarneratut ittoq uteqattaartuarpoq, uanili akitsuuserisut qimmiisalu ikiaroornartunik eqqussuisunik pisaqarniarnerat pineqarluni.
