Angut ikuallatsitsisimasutut eqqartuunneqartoq iperagaasorli

Angut 32-nik ukiulik nammineq anaanamilu inigisaminnik siorna apriilimi piaaraluni ikuallatsitsivoq. Angut pisup kingornali politiinit tigummigallarneqalerpoq, tassungalu tunngatillugu ippassaq ullumi eqqartuussisoqarpoq.

Aatsaannguarlu eqqartuussuteqartoqarpoq.

Angut piaaraluni ikuallatsitsimasutut inissiaqarfimmilu inunnut allanut navianartorsiortitsisimasutut eqqartuunneqarpoq. Angut toqutseriarsimasutut aamma unnerluutigineqarpoq, tassungali tunngatillugu pinngitsuutinneqarpoq. Angulli iperagaalluni.

Naalli unnerluussisup Signe Suhrip toqutseriarsimasutut unnerluutiginninnermi isumaqatigineqanngikkaluarluni suliap naammassinera naammagisimaarpaa.

- Angutip piffissami pinerliffiusumi silanngajaartutut nalunaarutigineqarsimanera maannakkut iperagaaneranut pissutaavoq, angullu maanna pilligassaajunnaarluni, Signe Suhr oqarpoq.

Angut piffissami pinerliffiusumi sakkortuumik isumatsangaarsimasoq eqqartuussinermi saqqummiunneqarpoq. Piffissap pinerliffiusup nalaani silanngajaarsimasutut nalunaarutigineqarsimagaanni pineqaatissiissummik eqqartuussisoqartussaaneq ajortoq, unnerluussisoq oqarpoq.

Nakkutigineqarluni katsorsarneqartussanngortinneqartoq

Angulli 32-nik ukiulik katsorsarneqartussanngortinneqarpoq, tassa angut katsorsarneqarnissaminik pisariaqartitsisoq nakorsanit nalilerneqassaguni tarnikkut napparsimasunut immikkoortortaqarfimmut unitsinneqarsinnaavoq. Angulli maanna katsorsarneqassanngitsoq Dronning Ingridip Napparsimmavissuani nakorsat nalilerpaat. Angut taamaammat ullumi iperagaavoq, unnerluussisussaatitaasoq oqarpoq.

Angut pinerluuteqarsimasunik isumaginnittoqarfimmit maanna nakkutigineqassaaq, tassanngalu sumiiffissaanik, najugassaanik sulileqqinnissaanillu ikiorneqassalluni.

Unnerluussisussaatitaasoq naammagisimaartoq

- Piviusumik eqqartuussutip inernera tupaallaatiginngilara, Signe Suhr oqarpoq.

Unnerluussisussaatiaasummi Nakorsap eqqartuussinermi siunnersuisartut angutip tarnikkut misissorneqarnera tunngavigalugu aalajangiinerata assinganik oqaatiginnissimapput.

- Taamaammat suliap naammassineqarnera naammagisimaarutigilluinnarpara.

Angutip katsorsarneqartussanngortinneqarnera pissutigalugu angut maannakkumit tarnikkut peqqinnginneruleqqissappat nakorsat Dronning Ingridip Napparsimmavissuani A1-imut qaqukkullunniit unitsitsisinnaalerput.

Angut siorna apriilip 27-anili politiinit tigummigallarneqalerpoq. Ualeq mannali eqqartuussuteqartoqarnerani najuuttut angutip arnaa, angut ikinngutaasorlu ualeq manna eqqissiallalluinnarput. Eqqartuussineq naammassineqarpat angut ikinngumminit eqitaarneqarpoq anaanaasorlu oqiliallannermit qullililluni.