Aqutsisut: Peqqissaasut Philippinerineersut akikinnerunngillat

Peqqissaasunik Philippinerineersunik 30-nik sulisoqalernissamut neqeroorummut Dronning Ingridip Napparsimmavissuani aqutsisut naaggaarput, naak peqqissaasunik amigaateqarneq annertugaluartoq. Taartaasartunit akikinnerunnginnerat tunngavilersuutiginiarneqarpoq.

Allattoq Louise M. Kleemann

februaarip 11-at 2009 11:51

Suliffeqarfik Health Care Danmark Nunatsinni Peqqinnissamut Pisortaqarfimmut decembarimi saaffiginnippoq, peqqissaasunik 30-nik Filippinerit Qeqertaanneersunik Nunatsinni atorfinikkusussinnaasunik neqerooruteqarluni, neqeroorulli itigartitsissutigineqarpoq.

- Taartaasartut aqutsisoqarfiiniit saaffiginnissummik pivugut. Taakku suliffissarsissussinertik aningaasannassutigisarpaat. Peqqissaasut taartaasartut qaammammusiaasa assiginik aningaasartuuteqartartussaavugut, taamaasiornerlu iluarnerunngilaq, allaffissornikkut ingerlatsisuuneq Ann Birkekær, Kjeldsen oqarpoq.

- Taamaammat nalinginnaasumik taartaasartut atuinnarutsigit assigiinnassavaa, taakkumi piginnaasaat atorfissaqartitavut pigereerpaat, Ann Birkekær Kjeldsen oqarpoq.

Health Care Danmarkimit paasissutissat malillugit peqqissaasup ataatsip oqaatsinik ilinniartinneqarnera suliffimmillu misiliinera 125.000 koruunit missaannik akeqarpoq. Peqqissaasut ukiuni pingasuni sulinissaat neriuutigineqarsinnaasoq Health Care Danmark erseqqissaavoq.

Taamaakkaluartoq peqqinnissaqarfimmi aqutsisunit peqqissaasut

filipinerineersut qallunaatut killilimmik ilinniartinneqarnissaat toqqissisimanartinneqanngilaq.

- Peqqissaasut taakku tamaanngarlutik kisimiillutik sulinissaminnut qallunaatut ilinniagaat qularnanngitsumik naammanngilaq. Kalaallit Nunaanni sulissagunik qallunaatut oqalussinnaasariaqarput, tamaanimi ilinniartinneqarnissaminnut periarfissaqanngillat, Ann Birkekær Kjeldsen oqarpoq.

Dronning Ingridip Napparsimavissuani peqqissaasut amigaataanerisa kinguneranik immikkoortortaqarfiit arlallit matusariaqarsimapput, pilattaanerillu kinguartinneqarsinnaanngitsut kisimik inuttassaqartinneqarlutik. Peqqinnissaqarfimmi taartaasartunut aningaasartuutit siorna 60 mio. koruuninik amerlassuseqarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.