Aasiaat Napparsimmavianni peqqissaasut sulinermi aningaasarsiatigullu atukkaminnik naammagittaalliornerat iluatsillugu peqqissutsimut naalakkersuisunngorlaap, Agathe Fontain-ip, Peqqissaaveqarfinnik Aqutsiviup Dronning Ingridip Napparsimmaavissuatalu aqunneqarnerat ataatsimoortinneqalissasut siunniunneqartoq nalunaarutigaa.
- Nassuerutigaara, ilaatigut peqqissaasussaaleqinerujussuaq qaangerniarlugu naqqaniit iliuuseqartariaqartugut, Agathe Fontain oqarpoq nangillunilu:
- Siulerisama Asii Chemnitz Narupip suliniutai nangissavakka. Peqqinnissaqarfiup aaqqissuuteqqinnissaanik Naalakkersuisut 2007-imi Upernaakkut Ataatsimiinnissamut siunnersuusiussapput, Agathe Fontain oqarpoq.
Peqqissaasut sulinermi atugaat Itisiliinermi, nalunaaqutaq arfinermut aallakaatinneqartumi, sammineqassapput.
