Aqqutaa ajornakusuulaarsimavoq Ailili sikkilinik ingerlasinnaaleqqippoq
“Sikkilera nuannareqaara” danskit meeqqanut erinarsuummi erinarsortarput, Aili Lage Labansenilu aamma taama misigisimavoq.
Pingaartumik sikkiliminit innaallagiatortumit Nuummi aqqusinertigut ingerlaarnermini saniatigut ikiorneqarsinnaatilluni.
- Sikkilit innaallagiartortut atorlugit qummukajaakkoortilluni ilungersornannginnerunera pitsaaqutigaa. Qummukajaarpassuaqarpugummi anorlertarlunilu, taanna oqarpoq.
Sikkilit innaallagiatortut nunatsinni akuerisaaleqqittut ataasinngormat paasinarsimavoq. Oqartussammi sikkilit innaallagiatortut arlallit inatsisinut unioqqutitsisut 2023-mi oktobarimi paasivaat.
Aili Lage Labansenip sikkiliminik atuisinnaaleqqinnini nuannaarutigaa. Taassuma naak biileqaraluarluni sikkini nuannarinerullugu oqaatigaa.
Taassuma sikkilini innaallagiatortoq ukiuni pingasuni pigaa, taannalu sila qanorluunniit ikkaluaraangat atortarpaa.
- Assorsuaq iluaraara. Ingammik illoqarfimmi soorlu Nuummi, ullaakkut ualikkullu sisamat missaani biilit tunuleriaaterujussuartaramik, taanna oqarpoq, nangillunilu:
- Avatangiisinut pitsaasuummat, nalinginnaasumiillu timigissarnerusinnaagama.
Sikkileerniarlu aamma nuannaartoq
Aili Lage Labansen nuannaangaatsiartuni kisimiinngilaq.
Nuummi sikkileerniap Morten Heilmannip malittarisassat nutaat aamma nuannaarutigai.
Taassuma sikkilit innaallagiatortut siulliit nunatsinnut ukiut 15-it matuma siorna tikissimasut nassuiaatigaa, taakkuli atorneqarnissaannut malittarisassaat ersarippallaarsimanngillat.
- Pisisartugut sikkilersinnaalersut oqarfigisinnaaleratsigit iluartorujussuuvoq. Sikkilertoqaqqusaajuaannarpoq, kisianni nalorninalaartumiinnikuugami. Taamaammat soqqusaanerluta aalajangiiffigineqarmat iluaqaaq.
Taassuma motori 750 wattiusinnaanera pingaartumik nuannaarutigaa, nunatsinnimi Europami sumiiffinnit allanit amerlanertigut sikkilinik innaallagiatortunik 250-imik watteqartunik atuiffiusunit sakkortunerulaartumik motoreqarnissaq pisariaqartinneqarpoq.
Akuerisaanissaanut malittarisassaqartoq
Naak sikkilivit innaallagiatortup atornissaanut ilerasuutissaqanngikkaluarlutit sikkilip akuerisaanissaanut arlalinnik suli piumasaqaateqarpoq.
- Cykeli ataasiinnarmik motooreqarsinnaavoq.
- Taamaallaat tukkartortilluni motoori ikiuutissaaq, taamaattoq 6 km/t tikillugu ikiuuteqarsinnaavoq (pisuttutut sukkatigisoq).
- Motoori annerpaamik 750 watt-inik sakkortussuseqassaaq.
- 25 km/t tikillugu motoori taamaallaat ikiuussinnaassaaq.
- Bremsinut, qullernut, atortunullu allanut tunngatillugu nalinginnaasumik sikkilinut malittarisassat atuutissapput.
- Cykelertoq cykelertilluni niaquarnaveeqquteqassaaq
Løbehjulit innaallagiatortut inatsisitigut akuerisaalernissaannut aamma kissaateqartoqarnikuuvoq. Taannali suli akuerineqanngilaq, kisianni ‘kingusinnerusukkut allannguummi ilanngunneqarumaartut’, naalakkersuisoqarfik allappoq.