Takornarialerisoq: Sikkilit innaallagiatortut takornariartitsinermi atorsinnaanngikkallarpakka

Christian Jeremiassenip sikkilini innaallagiatortut qulit takornariartitsinermini atortakkani Kangerlussuarmi uninngatikkallaannartariaqarpai. Akuerisaalissappatalu motoorit sakkortunerit akuerineqalissasut neriuutigaa.

Allattoq Sikkersoq Rosing Karlsen, Mads Malik Fuglsang Holm

novembarip 02-at 2023 07:46

Christian Jeremiassen Adventours.gl Kangerlussuarmiittumut piginnittuuvoq aammalu sikkilinik innaallagiatortunik sakkortuunik motoorilinnik qulinik Kangerlussuarmut tulluartunik takornarissanut attartortitsisarluni, imaluunniit imannak oqaatigiinnaraanni: attartortitsisarnikuulluni.

Politiimmi oktobarip aallartinnerani sikkilit innaallagiatortut nunatsinni inerteqqutaasut paasivaat. Angallannermut inatsit 1979-imili nutarterneqarnikuunngilaq, taamanilu sikkilit innaallagiatortut eqqarsaataanngillat. Taamaattumillu imminut assartorsinnaanermut sikkilit innaallagiatortut atornissaat inerteqqutaavoq.

- Assorujussuaq uggornarpoq sumiiffiit ataasiakkaani pisuinnaat aqqutaani maleruagassat aqunneqanngitsutut illutik ingerlaartarnerit kingunerigaat uagut inuussutissarsiorniarsarisugut kingunerlutsitsimmata, tassani uagut maleruagassat malikkaluarpagut.

Maannakkullu Naalakkersuisut sikkilit innaallagiatortut akuerisaalernissaat sulissutigaat. Danmarkip inatsisaa ilaarlugu nunatsinni atuutsinniarsaraat, tamannalu Christian Jeremiassenip isumaqataaffiginngilaa.

- Kalaallit Nunaat qaqqartuujuvoq imaluunniit aqquserngit sivingikkajaajusorujussuupput taamaammat motoorit sakkortunerunissaat pisariaqartipparput, Christian Jeremiassen oqarpoq.

Taamaattumik Chistian Jeremiassenip Naalakkersuisut suliaq asuliunngitsumik suliarissagaat aammalu Damarkimisulli motoorinik sakkortunernik atuisinnaanissaq neriuutigaa.

Danmarkimi sikkilit innaallagiatortut annerpaamik 250 wattsimik motoreqarsinnaapput aammalu tiimimut 25 kilometeri sukkassuseqalersitsilluni ikiuussinnaavoq, qaangerneqarpallu nammineq unissapput.

Atassut: Sikkilit sakkortunernik motoorillit akuerisaalerlik

Partii Atassut sikkilit innaallagiatortut oqallisaanerinut malinnaasimapput. Taakku ajornartorsiut sukkanerpaamik aaqqinneqartariaqartoq isumaqarput.

Taamaattumik partii nunatsinni sikkilit innaallagiatortunut malittarisassatut siunnersuummik siunnersuuteqarput. Ilaatigut sikkilit innaallagiatortut 500 wattsimik motooreqarsinnaalissasut siunnersuutigaat.

Taamaattumik sikkilit innaallagiatortut inerteqqutaapput

Kalaallit Nunaanni sikkilinut inatsit 1979-iminngaanneersuuvoq. Taamani sikkilit innaallagiatortut eqqarsaatigineqarsimanngillat, taamaattumik 'qamutit assakaasullit tukkaavimmik ingerlatillit […], motoorilersugaanngitsut' nunatsinni sikkilitut nassuiaatigineqartartut allassimavoq.

Taamaattumik politiit sikkilit innaallagiatortut knallertitut isigisariaqarpaat. Sikkililli innallagiartortut ikinnersaat knallertinut malittarisassani piumasaqaatinik naammassinnipput, taamaammallu sikkilit innallagiartortut tamakkua inatsisinik malinninngillat.

Aammattaaq løbehjulit, segways, segboard u-runnersillu innaallagiatortut inatsimmut tassunga aamma ilaapput, taakkulu Kalaallit Nunaanni atorneqarnissamut inerteqqutaallutik, taakku piumasaqaatinik naammassinninngitsutut isigineqarmata.

Qallunaat inatsisaat assigalugu motoorip sukkassusaa tiimimut 25 kilometeri sinnerpagu nammineq unittassaaq. Taassuma saniatigut sikkilit innaallagiatortunik ingerlatilluni niaqorornaveequteqartarnissaq inatsisaalissasoq aamma siunnersuutigaat.

Aammattaaq Partii Atassut sikkilit innaallagiatortut 500 wattsi sinnerlugu motoorillit akuerisaalissasut isumaqarput. Taakkuli sikkilit knallertitut scooteritullu malittarisassaqassasut partii isumaqarpoq.

Danmarkip inatsisaat ilaaginnarsinnaanngilarput

Sikkilinik innaallagiatortunik tuniniaasartut ilaat Arctic Star Sisimiuniittoq sikkilinik innaallagiatortunik nunatsinnut eqqussuisuupput.

Pisortaq Henrik Sachse naapertorlugu nunatsinni angallannermut malittarisassamut tunngatillugu sikkilit innaallagiatortut sakkortunerusinnaasariaqartut isumaqarpoq.

-Sikkilit nunatsinni ingerlaannarsinnaassappata batteerinik anginernik motoorinillu sukkanernik atorfissaqartitsivugut, tassami nunatsinni qummukajaaqarnerullunilu ukiukkut nillernerusarpoq, Henrik Sachse oqarpoq.

Arctic Star 1988-imili pilersinneqarpoq. Suliffeqarfik sneescooterit, ATV, UTV aammalu qamutit minnernut nioqqutissanik eqqussuisuullunilu isumaqatiginninniartartuuvoq. Taamaattumik Henrik Sachse arlaleriarluni nunatsinni angallannermut inatsit nunatsinnut ilaanni tulluarneq ajortoq naammattoortarpaa.

Christian Jeremiassenilu assigalugu nunatsinni politikerit qallunaat nunaata inatsisaat tiguunnassanngikkaat isumaqarpoq.

-Inatsit piviusumut tulluarneq ajortoq isumaqarpunga. Kalaallit Nunaanni atugassarititanut tulluarsakkamik inatsisitaartariaqarpugut, Henrik Sachse oqarpoq.

Danmarkimi angallannermut aqutsisoqarfiup Kalaallit Nunaanni sikkilinut innaallagiatortunut inatsisissatut missingiusissaq suliarisussaavaat, taamaasillunilu nunatsinni sikkilit innaallagiatortut akuerisaaqqilissallutik.

Missingiut nunatsinni tusarniaaffigineqaqqaassaaq taamaasillunilu nunatsinnut tulluarsaasinnaanissamut periarfissaqassalluni.