Aqqalu Jerimiassen sillimmasiisarfinnik namminersortunut peqqinnissaqarfimmut nakorsiartoqartalernissaanik atuilerusuttoq

Atassutip siulittaasua Aqqalu Jerimiassen sillimmasiisarfinnik namminersortunik nunatsinni peqqinnissaqarfitta artorsarneranut aaqqiissutissatut siunnersuuteqarpoq.

Sillimmasiisarfiit soorlu makkuusinnaapput: Tryg, Illit forsikring, aamma Kalaallit Forsikring.

Nunarsuatta ilaani nakorsiartarfiit namminersortut atorluarneqartorujussuupput- ingammillu pinartoqartillugu.

Taamaammallu akissaqartunut tamanut periarfissaasariaqaraluartoq, Aqqalu Jerimiassen isumaqarpoq:

- Peqqinnissaqarfipput taamak artorsartigitillugu pisariaqarsoriinnarparput inuiaqatigiinni oqilisaataasinnaasumik arlaatigut periarfissamik nutaamik takkuttoqarnissaa.

Sillimmasiisarfinnik namminersortunik atuinermik eqqarsaannarani Aqqalu Jerimiassenip namminersortunik nakorsaataarniarfeqalernissaa aamma eqqarsaatigaa:

Taamaammallu Aqqalu Jerimiassen periarfissanik nutaanik Peqqinnissaqarfitsinnut aaqqiissutaasinnaasunik ujartuerusuppoq.

Immikkut ilisimasallit mianersoqqussuteqartut

AKF-ip, tassa Danmarkimi kommunit soqutigisaannik ilisimatuussutsikkut misissuisarfik, misissuinerat ersersipaa, nakorsiartarfinnik namminersortunik atuilernitsigut, inuiaqatigiinni assigiinngitsoqalersinnaasoq.

Atorfillimmi aningaasaatillillu namminersortunut nakorsiarsinnaappata naammaannartumik isertitalinnut immikkoortitsinertut isigineqarsinnaavoq.

Aqqalu Jerimiassenili taama isumaqanngilaq.

- Imaattariaqanngilaq isertitakikkavit tassunngassanngitsutit. Sillimmasiisarnikkut tunngasunik tamakkuninnga aaqqissuussinitsigut imaassinnaasoq allaat isertitaqarnerpaaniik isertitakinnerpaanut tamarmik taamak periarfissaqalersinnaasut.

Apeqqutaaginnarporli qanoq akeqarnersoq qanorpiarlu akilerneqassanersoq.

Nakorsiartartummi ikiorneqartariaqarput, taamaattumillu allaaneerusumik eqqarsaqqittoqartariaqarpoq, aamma nunanut alllanut qiviarluta.

Aqqalu Jerimiassenimmi nuna sorleq nakorsiarfigisassaneripput apeqqutaatippallaanngilaa.

Peqqinnissaqarfimmut artorsareersumut arlaatigut oqilisaataasinnaanissaa nammagalugu.

- Peqqinnissaqarfitsinni maannakkut ingerlariuseq artorsartoq, akisooq, inuiaqatigiinnut nammakkiigaluttuinnartoq, sulisunut artukkiigaluttuinnartoq minnerpaannguamilluunniit oqiliallassinnaanera ujartorneqartariaqarpoq.