Ajunaarnersuaqarnera Annaasat sillimmasiinermit taarserneqarsinnaanngitsut

Ajunaarnersuimmi, soorlu sapaatit-akunnerata siuliani tassaarsuaqarnera, nammineerluni sillimmasiinerit amerlanersaanni ilaatinneqanngillat.

Sillimmasiisarfiup Kalaallit Forsikringip sullitai ataasiakkaaginnaat marlunngorneq tikillugu saaffiginninnissaminnut nukissaqarsimapput:

- Ikitsuinnarnit saaffigineqarpugut, sillimmasiisarfimmi pisortaq, Dora Drechsel, KNR-imut taama oqarpoq.

Taanna nassuiaavoq inuit nammineerlutik sillimmasiinerinut, "nunami" sillimmasiinernik taaneqartartunut, soorlu qamutinut motoorilinnut qamuteralattut ittunut, annaasat taarserneqarsinnaanissaat ilimanarpallaanngitsoq:

- Ajunaarnersuaqarnera, soorlu matumani pisoq, sillimmasiinermut ilaatinneqanngitsoq oqaatigaarput, Dora Drechsel Kalaallit Forsikringimeersoq taama oqarpoq.

Unammillertaa Codan, tuniniaasoqarfik Illit Forsikringit aqqutigalugu Nunatsinni sillimmasiisartoq aamma taamatoqqissaaq oqarpoq.

- Taamatut ajunaarnersuaqartillugu inuit annaasaat sillimmasiinermit taarserneqarneq-ajorput, Codan Forsikringimi tusagassiinermut pisortaq, Mads Houe, taama oqarpoq.

Nunaqarfimmiut qimagussortinneqarsimammata aseruatitertoqarsimaneranillu misissuiartornissaminnut periarfissaqanngimmata, ajoquserinerit tamakkiisumik paasisaqarfigisimanagit aamma erseqqissaatigaa.

Angallatinik sillimmasiinerit sullitallu inuussutissarsiutinik ingerlatallit

Nunaqarfimmiulli angallatiminnik umiatsiaminnilluunniit sillimmasiisimasut neriuutissaqarnerulaarpasipput. "Silarlunneranimi ajoqusertoqarnera" tamatumani atuutsinneqarsinnaavoq, Dora Drechsel taama nassuiaavoq:

- Anorersuarujussuartoqarsimasutullusooq isigalugu suliarineqassaaq, tamannami silarlunnerani ajoqusernertut isigineqarpoq suliarlu taamatut ingerlanneqassalluni. Angallat sillimmaserneqarsimappat.

Sullitat inuussutissarsiutinik ingerlatallit allaanerusumik inissisimasut, Codanimit oqaatigineqarpoq:

- Sillimmasiinermut tunngatillugu qarsutsinerit sillimmasiinermut ilaatinneqarneq-ajorput. Sullitavulli inuussutissarsiutinik ingerlatallit atortumik ajoqusersinnaanerinut tunisassiornerullu unittoorfiusinnaaneranut allanullu sillimmasersimasarput, Mads Houe taama oqarpoq.

Pisortat isumalluutigisariaqaraat

Taamaammat nunaqarfimmiut qimagussortinneqartut pisortanit katersuiniarnerniillu maanna ingerlanneqartunit ikiorserneqarnissartik isumalluutigisariaqassavaat.

Pisortat qanoq ilillutik ikiorsiiniarnersut suli erseqqissumik oqaatigineqarsinnaanngilaq, Sara Olsvigilli juunip 18-iani tusagassiortunik katersortitsinermi oqaatigaa Naalakkersuisut sapinngisartik tamaat ikiuunniartut:

 Pisariaqartitsisut ikiornissaat tapersersornissaallu piareersimaffigaarput. Naalakkersuisut tungaannit sapinngisarput tamaat ikiorsiissaagut, Nuugaatsiami tassaarsuaqarnerata aqaguani tusagassiortunik katersortitsinermi Sara Olsvig taama oqarpoq.