Aningaasat salloqittaatit ikiaroornartorlu
Qeqertarsuarmi politiit suliassaq aningaasanut salloqittaatinut tunngasoq manna misissuleruttorpaat. Arnaq Qeqertarsuarmiu TV-bingomi eqqukkaminik 500 koruunimik salloqittaammik pigisaqalersimavoq.
Arnap allakkerivimmi akiligassaminik akiliinialerluni 500 koruuni salloqittaataasoq aatsaat paasisimavaa, politiinukaallugulu.
Qeqertarsuarmi politiit aningaasaq salloqittaataasoq Danmarkimut misissoqqissaagassanngorlugu nassiussimavaat.
Illoqqortoormiuni politiit takornakkaminnik sapaatip akunnerata naanerani naammattoorsisimapput. Tassami politeeq Allan Lægteskov siusinnerusukkut ikiaroornartumik tuniniaanermut tunngasumik suliassamik naammattoorsisimanngilaq.
- Apriilimili maaniilerama aatsaat siullermik taamaattumik naammattoorsivunga, oqarpoq, inunnik marlunnik sapaatip akunnerata naanerani ikiaroornartumik tuniniaasimasunik tigusarinnereerluni.
Allan Lægteskovip ikiaroornartoq grammialunnguanik annertussusilik 2000 koruunillu arsaarinnissutigisimavai.
Paamiuni politiit ikiaroornartuminerit 0,1 grammit pingasut 1200 koruunillu ikiaroornartumik tuniniaanermit isertitat aamma arsaarinnissutigisimavaat.
