Aningaasaqarneq aatsitassaqarnerlu Demokraatinut annertuallaarsimapput
Randi Vestergaard Evaldsenip KNR-imut oqaluttuaraa, Naalakkersuisut nikisiterneranni aningaasanut inatsisissap, maanna isumaqatigiinniutigineqartup, pitsaanerusumik inerneqarnissaa eqqarsaatiginerullugu, aningaasaqarnermut naalakkersuisoqarfik, Andreas Uldumimit akisussaaffigineqartoq, Vittus Qujaukitsumit akisussaaffigineqalerpat tamanna pitsaanerusumik inerneqassammat, Demokraatinit tiguneqarnissaa sorsuutigisimannginnamikku.
- Aningaasanut inatsisissap isumaqatigiinniutigineqarnera ingerlatillugu tamanna tamassuminnga misilittagaqareersup ingerlappagu pitsaanerusorigatsigu, Andreas Uldumip uternissaata tungaanut allamut tunniupparput, Randi Vestergaard Evaldsen oqarpoq.
Aamma atuaruk Amigartoorujussuarneq Demokraatit sakkortuumik isornartorsiorpaat
Demokraatit allatut isummersimapput
Ukiup ataatsip matuma siorna Inatsisartunut qineqqusaarnerup nalaani, Randi Vestergaard Evaldsenip isornartorsiorpaa, Nunatta aningaasatigut amigartooruteqarnissaanik, Vittus Qujaukitsup akisussaasutut nalunaaruteqarnera.
- Aatsaat qinersinissaq qanikllilluinnartoq Nunatta aningaasatigut amergartooruteqarnissaanik nalunaarneq inuiaqatigiinnit toqqissisimalersitsinavianngilaq, tassami inuiaqatigiit peqataaffigisinnaanngilaat Naalakkersuisut toqqorternerat, 2014-imi novembarip 26-anni Randi Vestergaard Evaldsen taama oqarpoq.
Tassa maanna allatut Randi Vestergaard Evaldsen isummersimagunarpoq, tassami oqartussaqarfik annikinnerusoq maanna oqartussaaffigilerlugu sulinini aallartippaa.
Taassuma suliassatut siullertut taava, Nunatsinni takornariaqarneq eqqarsaatigalugu periusissiassap, Inatsisartut inuussutissarsiornermut ataatsimiititaliaanut saqqummiunneqarnissaa.
- Takornariartitsineq Nunatsinni ineriartortitseqataasussaasoq tamatta ilisimavarput. Takornariaqarnerullu ineriartortinneqarnissa pillugu nalunaarusiap ataatsimiititaliamut saqqummiunnissaa assut erinigaara, Randi Vestergaard Evaldsen oqarpoq.
Aamma atuaruk VIDEO Qujaukitsup aningaasanut inatsisissaq iluatsinniassavaa
Demokraatit akornanni isumaqatigiinngitsoqarpoq
Naalakkersuisut nutaamik nikisiterneranni, Demokraatiniit kina naalakkersuisunngussanersoq partiimi isumaqatigiinngitsoqarsimanera, Randi Vestergaard Evaldsenip ilumuunnginnerarpaa oqarlunilu apeqquserneqarsimanngitsoq nammineq naalakkersuisutut ivertinneqarnini.
- Partiitsinni pikkorilluinnartunik tunuliaquteqarpugut tamattalu immikkut pikkoriffeqarluta. Taamaattumik kina tulluarnerusoq pillugu oqaloqatigiissutigaarput. Aamma oqaatigisariaqarpara, Demokraatit pikkoriffigaat isumaqatigiinngittarneq tamassumalu aaqqeqqinneqarnissa pikkoriffigalutigu.