Amigartoorujussuarneq Demokraatit sakkortuumik isornartorsiorpaat
Partiillu siulittaasui apeqqutigisaqattaagaat tassaavoq: Sooq aningaasaqarnermut naalakkersuisoq kisitsisinik saqqummiussinissaminut qaammatip aappaa avillugu utaqqisimava, aamma sooq nunatta karsia ukiormanna taama amigartoorujussuariasaartigiva?
- Sivisuupilussuarmik utaqqisitaavugut, amigartoorujussuartoqarsimaneranillu ernumassuteqarnerput uppernarsivarput missingersuutinik malittarinninneq saqqummiunneqarmat. Nunarput aningaasaqarnikkut ilungersunartupilussuarmik inissisimavoq, tamannalu ernumanarpoq Demokraatit siulittaasuat Andreas Uldum oqarpoq.
Aamma atuaruk Ilisimasalik: 2014-imut missingersuutit kusassaanertut isigineqarsinnaapput
Isumalluarpallaarsimasut
Taamarsuaq naatsorsuinerluttoqarsinnaanera paasiuminaartippaa, tassami sinneqartooruteqarnissamik naatsorsuuteqarneq milliardip sisamararterutaanik amigartooruteqarnermut mumisinneqarmat.
- Tupamut imigassamullu akitsuutinit isertitat ikilisimanerannik utoqqatsissutipalaanik tusarusunngilanga. Tamanna kisiat nassuiaataasinnaanngilaq.
Aamma atuaruk Nunatta karsia milliardip sisamararterutaanik amigartooruteqarfiusoq
- Isumaqarpunga Siumut Atassullu 2014-imut Aningaasanut inatsit suliarigamikku isumalluarpallaarsimasut. Partiit marluk aningaasaqarnermik aningaasatigullu aqutsinermik taama ilisimasakitsiginerat tupigusuutiginanngitsuunngilaq, tusagassiorfinnut nalunaaruteqarluni taama allappoq.
2009-mi 500 millioninik amigartooruteqartut
Demokraatit Inuit Ataqatigiit peqatigalugit 2009-mi naalakkersuisuulermata nunatta karsiata milliardip affaanik amigartooruteqarfiusoq tigusimallugu aamma erseqqissaatigaa.
- Maannakkullu ukiup aappaa avillugu ingerlanerinnaani Siumup Atassutillu nunatta aningaasaqarnera aserorluinnarsimavaat aamma ajoraluartumik missingersuutit naatsorsukkat takutippaat ernummatigisatsinniik ajornerujussuarmik pisoqalersoq, Andreas Uldum naggasiivoq.
Nunatta karsia pillugu nutaarsiassat kingulliit uani atuarneqarsinnaapput
