VIDEO Qujaukitsup aningaasanut inatsisissaq iluatsinniassavaa

Siumumeersup Vittus Qujaukitsup Aningaasaqarnermut naalakkersuisoqarfimmut uternermini nunatta karsia akisussaaffigileqqippaa, soorlu aamma ukioq ataaseq matuma siorna qinersinissaq sioqqullugu tamanna akisussaaffigigaa maannalu naalakkersuisuusunut millionerpassuarnik amigartooruteqarneq ingerlateqqillugu.

Allattoq Kassaaluk Kristiansen, Bikki P. Kleist, Camilla Dam

novembarip 04-at 2015 11:22

Tamannalu pivoq aningaasanut inatsisissap isumaqatigiinniutigineqaleruttornerani, Anda Uldumip napparsimanini pissutigalugu sulinngiffeqarallartussanngormat.

Tamannalu Partii Naleqqap siulittaasuata Hans Enoksenip aarlerinartoqartippaa, Qujaukitsummi nunatta karsia 220 millionit koruuninik amigartooruteqarfiusoq ukioq ataaseq matuma siorna tunniummagu.

- Puigussanngilarput aningaasaqarnermut naalakkersuisuunermini torrallaanikuunngimmat, Partii Naleqqap siulittaasua taama oqarpoq.

Aamma atuaruk Kielsen: Qujaukitsup gruppi nukittunerulersissavaa

Vittus Qujaukitsulli suliassamut piukkunnaateqarnini erseqqissarpaa.

- Soorunami. Taamaaliorsimanavianngikkaluarpunga suliassaq uannut isaanneqarsimanngikkaluarpat. Aamma tatigineqarnera soorunami taanna tulluusimaarutigivara.

Aamma atuaruk Vittus Aningaasaqarnermut naalakkersuisoqarfimmut uterpoq

Aningaasaqarnermut naalakkersuisup erseqqissarpaa aningaasaqarniarneq kaaviiaartikkuminaatsupilussuaq allanngortinniassagaanni arlaatigut pisoqartariaqartoq.

- Nunatta aningaasaqarnera sumik toqqammaveqartoq qiviaraanni, aalisarneq inuussutissarsiutini kisiartaalluni nunatta isaatitsivigivaa. Nunatta isaatitsivissaanik allanik aatsitassarsiornermut, niuernermut, takornariaqarnermut inuussutissarsiutinilu annertuumik suliffeqarfissuarnik pilersitsiniarnermi ikaarsaariarnermi tunngavissaqanngippat isaatitsivissarput ataasiinnaasussaavoq, Vittus Qujaukitsoq taama oqarpoq.

Naalakkersuisooqatigiinnit tapersersorneqarpoq
Naalakkersuisuutitaqartut aningaasanut inatsissaq pillugu isumaqatigiinniarnernut, Inatsisartuni ulluni makkunani ingerlanneqartunut, annertunerusumik sunniuteqassasorinngilaat.

- Aningaasaqarnermut naalakkersuisunngorallartup suliassaqarfiginikuugamiuk suleriutsit assigiinngitsut isersimaffigilluarpai, taamaammat tassuunatigut aamma ajunngitsortalerujussuuvoq, Qujaukitsup parteeqataa Jens-Erik Kirkegaard KNR-imut taama oqarpoq.

Aamma atuaruk Illuatungiliuttut: Naalakkersuisut amerlinerat torrallaanerunngilaq

- Kinguneqassanngilaq, pissutigalugu isumaqatigiinniarnerit ima ingerlareersimatigipput allaat suliassat ilaatigut naammassiartortutut isikkoqalereersimallutik, Atassummeersoq Steen Lynge taama oqarpoq.

- Isumaqatigiinniarnerit pillugit Demokraatit tungaannit allanngortoqanngilaq, Demokraatineersoq Tillie Martinussen taama oqarpoq.

Partiilli illuatungiliuttut Inuit Ataqatigiit aamma Partii Naleraq allatut isumaqarput.

- Oqaloqatigiinnerit qularnanngilaq allanngussapput, taavalu immaqa allaat nutaamik aallartittupajaaq isikkoqarsinnaallutik, Partii Naleqqap siulittaasua Hans Enoksen taama oqarpoq.

Aamma atuaruk Qaleralinnut akitsuusiiniarneq isornartinneqaqisoq tunuartinneqarpoq

- Ilungersunartua uaniippoq Naalakkersuisut ataatsimoorlutik Inatsisartunut siunnersuuteqartarnerat nikerartorujorujussuuvoq, ullormit ullormut millionilinnik arlalinnik nikeqattaarami, Aqqaluaq B. Egede IA-meersoq taama oqarpoq.

Aningaasanut inatsisissaq pillugu isumaqatigiinniarnerni allannguuteqaqqissanersoq Vittus Qujaukitsup oqaaseqarfigiumanngilaa.

Aningaasanut inatsisissatut siunnersuut novembarip 11-ani aappassaaneerneqassaaq, ullullu qulingiluat ingerlareerpata pingajussaaneerneqassalluni.

Nutaarsiassami kukkunermik nassaarsimaguit uunga allaffigineqarsinnaavugut.