Qaleralinnut akitsuusiiniarneq isornartinneqaqisoq tunuartinneqarpoq
Qalerallit suliarineqanngitsut avammut niuerutigineqartarnerisa akitsuusersorneqarnissaat isornartorsiorneqangaatsiareertorlu tunuartinneqarpoq.
Aningaasaqarnermut naalakkersuisoq, Vittus Qujaukitsoq taama nalunaaruteqarpoq.
Qalerallit tunisat tamarmik akitsuuteqalissapput
Qalerallit suliarineqanngitsut akitsuusersorneqarnissaannut siunnersuut SIK-mit, KNAPK-mit Sulisitsisunillu ataatsimoorlutik sakkortuumik isornartorsiorneqarpoq.
Isornartorsiuinerlu aningaasaqarnermut naalakkersuisup, Vittus Qujaukitsup, tusarniarsimallugit tusagassiuutinut nalunaarummini allappoq.
Aamma atuaruk Qalerallit suliarineqanngittut akitsuusernissaat akerlerineqaqaaq
- Taamatut iliuuseqarlutik kattuffiit akitsuuteqartitsinermik politikkip pitsanngorsarnissaanut akisussaaqataaniarnerallu nuannaarutigaara, taamaattumillu siunnersuutigisaat tusaatissatut tigorusuppara, Aningaasaqarnermut Naalakkersuisoq Vittus Qujaukitsoq allappoq.
Ukiaanerani ataatsimiinnermut Inatsisartut pilersaarutaat malillugu akitsuusersuinissamut siunnersuut ullumi siullermeerlugu eqqartorneqartussaagaluarpoq.
Suli eqqartugassanut ilaavoq
Ataatsimiinnermi pilersaarummi suli eqqartugassatut allaqqavoq. Taannali massakkut allarluinnermik nipeqarpoq. Inatsisartut akitsuusersuinermut siunnersuut nutaaq maannakkut oqaluuserisussanngorpaat. Nunatta karsianut 20 millioni koruuninik siunnersuutip siulia assigalugu aamma isertitsissutaassaaq.
Akitsuusersuinermut siunnersuut nutaaq, massakkut pingajussaanik allanngortinneqarpoq. Taamaalilluni qaleralinnut akitsuut 5 procentimik annertussusiligaq, assigalugu kilonut ataasiakkaanut 80 oori, atuutsinneqalissalluni. Tamatuma ukiumoortumik Nunatta Karsia koruuninik 20 millioninik isertitaqartissagaa naatsorsuutigineqarpoq, taamaalilluni ukiunut sisamanut Aningaasanut Inatsisip ingerlatsinermut sanaartornermullu aningaasartuutaanni oqimaaqatigiissitsinissaq pillugu anguniagaq attanneqassalluni.
